Pavarësisht apeleve të ekspertëve të OKB-së nga shkurti i këtij viti për ndalimin e eksportit të armëve në Izrael për shkak të krimeve në Gaza, në muajin mars Serbia ka eksportuar armë në këtë vend në vlerë prej 14 milionë eurosh, sipas të dhënave të Drejtorisë Doganore të mbledhura nga Checkpoint, raportoi BIRN Serbia.
Kjo është, siç thonë ata, dërgesa e tretë e armëve që Serbia i ka dërguar Izraelit që nga sulmi i Hamasit ndaj Izraelit në tetor 2023.
Agjencia Fena thekson se BIRN zbuloi më parë se kompania kryesore shtetërore e eksportit të armëve, Jugoimport-SDPR, dërgoi dy dërgesa me një vlerë totale prej më shumë se një milion euro.
Në tetor 2023, Jugoimport ka eksportuar mallra me vlerë 540,120 euro, ndërsa në shkurt të këtij viti ka dërguar në Izrael një ngarkesë prej 510,000 euro, sipas BIRN në rrjetin social X.
Ministria e Tregtisë së Brendshme dhe të Jashtme refuzoi t’i jepte BIRN-it të dhëna të detajuara se sa armë u eksportuan në Izrael që nga sulmi i Hamasit në tetor 2023, duke e shpallur sekret shtetëror, raporton portali Nova.
A janë dërgesat pjesë e një marrëveshjeje paraprake?
Al Jazeera kujton se gjatë luftës izraelite kundër Gazës, Serbia u përpoq publikisht të shmangte ndërhyrjen politike në konflikt dhe Beogradi mbajti një qëndrim relativisht neutral me qëllim të ruajtjes së marrëdhënieve.
Sipas analistëve, Serbia ka lidhje me Izraelin dhe në të njëjtën kohë nuk dëshiron të paraqitet në skenën ndërkombëtare si dikush që minon interesat palestineze.
Kujtohet gjithashtu se si BIRN Serbia, një muaj më parë, njoftoi se Beogradi kishte bërë të paktën dy dërgesa të mëdha armësh ose municionesh në Izrael që nga sulmi nga Hamasi në tetor 2023, “pavarësisht velit të fshehtësisë që mbulonte punët”.
Igor Novaković, drejtor i kërkimit në Qendrën për Çështjet Ndërkombëtare dhe të Sigurisë (ISAC), i tha Al Jazeera-s se dërgesat ishin të mundshme pjesë e një marrëveshjeje të mëparshme.
“Klauzola e fshehtësisë ndoshta ekziston për të parandaluar prishjen e imazhit të Serbisë, në kuptimin që mund të interpretohet si mbështetje për luftën e Izraelit kundër Hamasit,” tha Novakoviç. /tesheshi.com/
