Agjencia Reuters i referohet sot së përditshmen gjermane Bild, duke njoftuar se agjencia gjermane e spiunimit po punon me shërbimin sekret sirian të Beshar Esadit për të shkëmbyer informacion mbi ISIS-in. E kjo ndodh, sipas agjencisë së lajmeve, pavarësisht kundërshtisë së Berlinit që Esadi të qëndrojë në pushtet pas një marrëveshjeje paqeje.
E përditshmja gjermane ka pretenduar se agjentët e BND-së, Shërbimit të Fshehtë Gjerman, kanë udhëtuar rregullisht për një kohë drejt Damaskut për konsultime me kolegët sirianë.
Bild ka shkuar më tej, duke treguar se BND-ja kërkon të hapë sa më shpejt një qendër në kryeqytetin sirian, për të pasur atje agjentë të vendosur në mënyrë të palëvizshme.
Deri më tani nuk ka patur komente të autoriteteve përkatëse mbi artikullin e Bild-it. Zëdhënësja e qeverisë gjermane, Christiane Wirtz, u tha gazetarëve: “Nuk mund të bëj koment mbi hollësitë operative të punës së BND-së.” Vetë BND-ja gjithashtu nuk ka reaguar për lajmin. /tesheshi.com/
