Kuvendi i Shqipërisë ka mbyllur sot legjislaturën e VIII-të të tij duke shënuar një rekord historik për numrin e deputetëve me probleme me ligjin dhe drejtësinë. Po ashtu, në 4 vite do të mbahet për disa reforma me rëndësi, një ndër të cilat është ajo e drejtësisë…
Parlamenti shqiptar u shpërnda këtë të enjte duke e quajtur të përfunduar mandatin e tij 4-vjeçar të marrë në qershor të vitit 2013. Kjo legjislaturë nisi me votimin gati unanim të një kryetari parlamenti që për herë të parë vjen nga një parti e vogël, jo nga PD e PS, dhe përfundoi me një bojkot parlamentar të opozitës.
Disa reforma të rëndësishme janë miratuar nga parlament dhe pse në një paradoks të plotë me përbërjen e tij.
Votimi i reformës në drejtësi u bë nga një parlament që kishte në gjirin e tij numrin më të madh të deputetëve me hesape të palara me drejtësinë: kriminelë dhe njerëz me të kaluar të dyshimtë. Një numër deputetësh janë detyruar të lënë mandatet e tyre në mes pasi u prekën nga ligji i dekriminalizimit për të shkuarën e tyre kriminale. Diskursin politik në Kuvend edhe një 4-vjeçar tjerër e dominuan liderët e partive dhe nuk pati prurje të reja në debatin poklitik, por deputetë që vlenin sa një karton i ngritur në varësi të vendimarrjes politike partiake.
Debatet e seancave parlamentare u dominuan nga pak protagonistë si Sali Berisha, Ben Blushi e Edi Rama, ndërsa nga ana produktive në miratim ligjesh dhe në kontrollin kushtetues ndaj institucioneve të tjera mund të jetë parlamenti më i dështuar ose më anti-kushtetues. Prej 4 muajsh ka mbaruar mandati i Avokatit të Popullit dhe nuk është ndërmarrë asnjë procedurë ligjore për ta zëvendësuar. Shumë institucione kushtetuese nuk kanë arritur të raportojnë në Kuvend për punën e tyre. Ligjet nuk janë prodhura nga Kuvendi, edhe pse është organi ligjvënës, por kanë ardhur nga qeveria dhe vetëm janë miratuar në Kuvend. Kjo ka ardhur dhe për shkak se përbërja e kësaj legjislature është pa kulturë juridike. Nga të dhënat vetëm 31 deputetë, ose më shumë se një e pesta e parlamentit janë diplomuar në juridik, por dhe ndër këta e kanë juridikun si specializim post-universitar ose part-time kryesisht në universitete private që u cilësuan si me probleme pas reformës në arsim.
Reformat
Të paktën 3 reforma do të shënojnë kulmin e këtij Kuvendi dhe pse ai më shumë ai ishte vetëm miratues i tyre dhe jo iniciator; reforma në drejtësi që shënoi ndryshimet më të mëdha kushtetuese më datën 2 korrik 2016 duke parashikuar një reformim të gjithë sistemit të drejtësisë; reforma territoriale; reforma në arsim dhe ajo e pensioneve të inicuara nga qeveria. Por ky Kuvend nuk arriti dot të bënte reformën e re zgjedhore e cila nëse do të ishte realizuar në kohë nuk do të çonte në këtë krizë politike ku jemi sot; ku opozita pretendon se nuk ka garanci për lirinë e zgjedhjeve.
Sjellja e opozitës gjatë kësaj legjislature ka shënuar dy bojkote dhe një fitore me miratimin e ligjit të dekriminalizimit, për të cilin ajo ishte iniciatore dhe bojkotoi Kuvendit në shenjë proteste për arritjen e miratimit të këtij ligji, i cili më pas u bë shkaku i hapjes së lakrave për deputetët me të shkuar kriminale, ku u penalizua më shumë mazhoranca, por edhe vetë opozita.
Bojkoti tjetër erdhi në fund të mandatit deri ditën e fundit të Kuvendit, duke lënë pezull miratimin e institucioneve të vetingut, pjesa më i rëndësishëm i reformës në drejtësi të miratuar me konsensus një vit më parë.
Edhe ky Kuvend mbeti larg pritshmërisë së publikut dhe mund të jetë parlamenti me nivelin më të ulët të besimit të publikut. Gjithashtu ai mund të konsiderohet dhe më i dobëti nga pikpamja e përbërjes dhe më pak produktivi në nisma ligjore dhe në funksionet e tij kushtetuese. Nga ana tjetër, konflikti politik mbizëtori punën e tij duke e nisur me bojkot dhe duke e mbyllur me bojkotin e opozitës. /tesheshi.com/
