Kryetari i Kuvendit ka mbajtur konferencë të jashtëzakonshme për shtyp pas akuzave të ambasadorit të SHBA-së Donald Lu ndaj kryeprokurorit Adriatik Llalla.
Kreu i Kuvendit ka mbajtur anën e kryeprokurorit duke tentuar të përgënjeshtrojë apo rrëzojë argumentet e ambasadorit amerikan në Tiranë.
Meta ka deklaruar se procedurat e përzgjedhjes së kanddidaturave për Këshillin e Emërimeve në Drejtësi janë bërë sipas Kushtetutës dhe ligjeve.
“Nisur nga deklaratat e ambasadorit lidhur me listën e kandidatëve për t’u përfshirë në shortin e KED me kërkesën time, Sekretari i Përgjithshëm i Kuvendit ka kërkuar sqarime shtesë për vlerësimin e kryer nga Prokuroria për plotësimin e kritereve dhe kushteve lugjire. Në përgjigje të kësaj shkrese prokurori ka kthyer përgjigje zyrtare. Kushtetuta përcakton se KED përbëhet nga 9 anëtarë nga të cilët njëri zgjidhet nga prokurorët e Prokurorisë së Përgjithshme, dy nga anëtarët pranë prokurorive të Apelit”, tha Meta, i cili ka deklaruar se është kërkuar sqarime për gjithçka dhe u arrrit në përfundimin se nuk ka pasur asnjë prokuror tjetër që të plotësonte kushtet e caktuara në ligj.
Donald Lu deklaroi se njerëzit e dërguar nga Llalla për Këshillin e Emërimeve në Drejtësi janë zgjedhur jo me short por me paracaktim.
Por Meta tha sot se kjo është bërë pasi nuk ka pasur më shumë se 3 prokurorë që plotësonin kriteret.
Pavarësisht këtyre sqarimeve me natyrë juridike, dalja e Metës në krah Llallës është një gjest i fortë simbolik që tregon se dhe kreu i LSI-së është në frontin e atyre që nuk janë dakort me protagonizmin e kreu të diplomacisë amerikane në Tiranë.
Javë më parë, mes Lu-së dhe Metës pati dhe një gjest të pazakontë, ku i pari i dorëzoi të dytit në sy të publikut një letër, që më pas u gris nga Meta me njëfarë nervozizmi. Dhe kjo ndodhi gjatë një konference ku Lu përmendi me emër Balilin, njeriun e LSI-së i cili tashmë është më i kërkuari nga policia dhe që ka përçarë keq politikën shqiptare. /tesheshi.com/
