Presidenti amerikan Joe Biden po humbet terren ndaj rivalit të tij republikan Donald Trump, i cili është përpara tij në një sondazh të publikuar nga New York Times të shtunën, dhe po tregon “shenja alarmante” për disa prej votuesve demokratë.
Sondazhi u publikua tetë muaj para zgjedhjeve të nëntorit dhe katër ditë përpara Super Martës, kur 15 shtete mbajnë zgjedhje paraprake paralele republikane dhe demokrate.
Joe Biden dhe ish-kreu i shtetit Donald Trump janë pothuajse të sigurt se do të fitojnë nominimet e partive të tyre.
Nëse votuesit do të duhej të vendosnin sot, 43 për qind do të votonin për Biden, dhe 48 për qind për Trump, sipas sondazhit të kryer nga New York Times dhe Kolegji i Universitetit të Sienës në nivel kombëtar.
Sondazhi zbulon “një numër sinjalesh alarmante për presidentin brenda elektoratit demokrat, veçanërisht midis grave, votuesve zezakë dhe latinë”, si dhe midis punëtorëve, shkruan New York Times.
Vetëm një në katër votues mendon se vendi po shkon në drejtimin e duhur dhe “shumica mendon se ekonomia po ecën keq”, shton gazeta.
Pavarësisht pengesave të shumta ligjore, ish-presidenti “fitoi 97 për qind të votave të atyre që thanë se votuan për të katër vjet më parë, dhe pothuajse asnjë nga ish-mbështetësit e tij nuk tha se donte të votonte për Biden”.
Në të kundërt, “Biden po merr vetëm 83 për qind të votuesve të tij të vitit 2020 dhe 10 për qind e tyre thonë se tani e mbështesin Trumpin,” shtoi New York Times.
Përveç ekonomisë, mosha e Presidentit Biden, 81 vjeç, si dhe mbështetja e tij e fortë për Izraelin, i cili është në luftë në Gaza, po shkakton shqetësime brenda një pjese të elektoratit demokrat.
Në nëntor, New York Times publikoi një anketë një vit para zgjedhjeve presidenciale që tregoi se Trump tashmë është përpara Bidenit në pesë nga gjashtë shtetet kyçe, ndërsa mbështetja e presidentit aktual mes të rinjve dhe pakicave është e dobët. /tesheshi.com/
