Forcat speciale irakiane kanë hyrë për herë të parë në rrethinat lindore të Mosulit, ndërsa beteja për çlirimin e qytetit bëhet më e ashpër.
Një raportuese e Al Jazeera-s nga terreni, Stefanie Dekker, ka bërë të ditur se ka luftime intensive e se luftëtarët e ISIS-it po rezistojnë.
“Na është thënë nga forcat peshmerge se qielli i zi është rezultat i djegies nga ISIS-i të puseve të naftës dhe të gomave rreth e rrotull Mosulit. E dimë tani se kjo është një nga taktikat për t’i bërë të padallueshme pozicionet e tyre gjatë sulmeve ajrore të koalicionit…,” thotë raportuesja e rrjetit informativ.
Kryeministri irakian u bëri thirrje dje militantëve të ISIS-it të dorëzohen.
“Ata nuk kanë zgjidhje. Ose të dorëzohen, ose të vdesin,” deklaroi Hajdar Abadi në një dalje televizive.
Një ditë më pas, trupat irakiane kanë hapur zjarr me artileri dhe me tanke në të hyrë të lagjes Gogjali. BBC-ja njofton për shumë më tepër rezistencë se në ditët e shkuara.
Operacioni për marrjen e Mosulit filloi më 17 tetor, dhe besohet se do të vijojë gjatë. Qyteti irakian është në duart e ISIS-it që prej qershorit të 2014-s. /tesheshi.com/
