Mazhoranca duket se po shkon drejt një strategjie që të mos marrë goditje anësore nga efekti “Shukri Xhelili” në Dibër.
Sot, këshilli bashkiak ka vendosur që kryetari i shkarkuar i Bashkisë të zvëndësohet nga Et`hem Fida, një përfaqësues i PDIU-së së Shpëtim Idrizit, qw wshtw pra nënkryetari aktual.
Fida do të drejtojë Bashkinë Peshkopi deri në në momentin e zgjedhjes së kryetarit të ri të këtij institucioni.
Në ditët në vijim pritet që Presidenti i Republikës Bujar Nishani të publikojë datën e zgjedhjeve për kreun e ri të Bashkisë Dibër.
Et’hem Fida është përfaqësues i partisë së çamëve edhe pse s’është çam. Në Dibër, duket se është konretizuar më së miri postulati i Shpëtim idrizit se “çam nuk je, por bëhesh”.
Dhe në fakt, PDIU i ka rritur shumë lëvizjet në Dibër, ku Idrizi ka zhvilluar disa ture brenda një muaji.
Po ç’lidhje ka Shpëtim Idrizi në një rreth që nuk ka pasur kurrë popullsi me origjinë në Çamëria.
Edhe nëse ka qenë ndonjë çam me kokërr, ai ishte rast i veçuar. Por në zgjedhjet lokale të 21 qershorit, PDIU doli parti e tretë në Dibër dhe arriti të marrë nënkryetarin e bashkisë dhe një numër të konsiderueshëm këshilltarësh.
Çka ndodhur?! Shpëtim Idrizi, ka afruar në partinë e tij një emër të njohur në disa qarqe të caktuara, siç është Ymer Lala, një biznesmen me lidhje të forta në territor, i cili për 20 vitet e demokracisë ka lëvizur sa në një parti në tjetrën, duke u kërkuar nga krerët politikë.
Ndërsa e ka nisur veprimtarinë e tij me Partinë Demokratike, ai shkoi më pas me Fatos Nanon, u afrua me Metën, pati marrëdhënie me Ramën, për të përfunduar tek Shpëtim Idrizi.
Si një personazh jo klasik i politikës, por me lidhje territori në Dibër tek pjesa parapolitike, Lala ka arritur të fuqizojë votat e PDIU-së në këtë trevë, duke e kthyer këtë bashki si një “ishull çam” në Republikë.
Ndaj dhe emërimi i Fidës, një eksponenti të PDIU-së parasheh një betejë asnjanëse në zgjedhjet e pjesshme që do të zhvillohen pas 6 muajsh.
Edhe nëse PD-ja do të fitojë, ajo do të ketë përballë jo një përfaqësues të PS-së apo LSI-së, që mund të ndëshkohen fuqishëm në rang vendi nga një humbje, sidomos pas rastit të turpshëm të Shukri Xhelilit.
Ndërkohë PDIU, edhe nëse humb, konsolidoin për 6 muaj pozitat për të rritur numrin e votave që i duhen për zgjedhjet parlamentare dhe mund të rrisë numrin e këshilltarëve, duke qenë përballësja kryesore në betejën për kryetarin e Dibrës.
Duket se Rama do të përdor një “ilaç” që nuk jep efekt të menjëhershëm por e shpëton partinë e tij tashmë të shkërmoqur nga skandali që të poshtërohet në një palë zgjedhje që do të jenë një referendum me apo kundër “Shukes” brekëgrisur.
Gjithsesi kjo është një lëvizje “pa top” duke u shmangur realisht nga “vënia e gishtit në plagë”, metodë që vërtetë mund të dëmtojë në moment, por që ka gjasa që të ngrejë një strukturë politike më të pastër dhe pa infeksione, pa qenë nevojë për të përdorur antibiotikë të rastit që po ndodh sot me lëvizjen e PDIU-së.
Kjo forcë politike që drejtohet nga Shpëtim Idrizi nuk është një parti klasike, por një grup që përfaqëson kauzën çame dhe si e tillë nuk ia vlen që të hyjë në ujrat e ndotura të parapolitikës, të cilat në periferi nxihen edhe më tepër… /tesheshi.com/
