Kryeministri spanjoll Pedro Sanchez ka bërë thirrje që Izraeli të përjashtohet nga ngjarjet kulturore ndërkombëtare, siç është Konkursi i Këngës në Eurovision, për shkak të luftës në Gaza, ashtu siç Rusisë iu ndalua kjo pas pushtimit të Ukrainës.
“Nuk mund të lejojmë standarde të dyfishta, madje as në kulturë”, tha Sanchez, një socialist dhe kritik i hershëm i politikës izraelite në territorin e pushtuar palestinez, raportoi Reuters.
“Unë besoj se askush nuk u trondit tre vjet më parë kur Rusia u përjashtua nga garat ndërkombëtare si Eurovision pasi pushtoi Ukrainën. Prandaj, as Izraeli nuk duhet të marrë pjesë”, tha ai.
Sanchez u bëri thirrje artistëve të mbrojnë vlera si demokracia dhe paqja, duke kritikuar ata që mbrojnë një “sektor kulturor të zbehtë dhe të heshtur”.
Kujtojmë se ditë më parë, Sanchez e quajti Izraelin qartë një shtet gjenocidal, duke thënë se për këtë arsye Spanja nuk do bëjë tregëti me të.
Kërkesat për transparencën e votimit
Transmetuesi publik belg flamand VRT i ka kërkuar Unionit Evropian të Transmetimeve (EBU) transparencë në lidhje me votimin në edicionin e 69-të të Konkursit të Këngës Eurovision që u mbajt në Bazel.
Zëdhënësja e VRT, Yasmine Van der Borght, deklaroi se nuk ka indikacione se numërimi i votave në të ashtuquajturin televotim nuk është bërë siç duhet, por ata po kërkojnë transparencë të plotë nga EBU-ja.
“Pyetja kryesore është nëse sistemi aktual garanton dhe pasqyron mendimet e shikuesve dhe dëgjuesve“, tha ajo.
VRT lëshoi deklaratën e saj pasi transmetuesi publik spanjoll RTVE kërkoi që EBU të kryente një hetim mbi rezultatet e votimit të transmetuar televiziv të së shtunës. RTVE e konsideron të çuditshme që, pavarësisht protestave kundër pjesëmarrjes së Izraelit në Eurovision, përfaqësuesi izraelit mori numrin maksimal të pikëve nga votuesit televizivë në Spanjë.
Shqetësim për mbijetesën e garës
Më parë, transmetuesi publik spanjoll bëri thirrje për një diskutim të hapur në lidhje me pjesëmarrjen e Izraelit në garat e ardhshme. VRT mbështet kërkesën e RTVE dhe lëshon përsëri “një thirrje të qartë për të marrë pjesë në debat me të gjitha kombet, nga angazhimi dhe shqetësimi i vërtetë për mbijetesën e garës”.
“Ne në VRT vërejmë se Festivali i Këngës në Eurovision, siç organizohet aktualisht, po bëhet gjithnjë e më pak një ngjarje unifikuese dhe apolitike. Është gjithnjë e më shumë në kundërshtim me standardet dhe vlerat e tij origjinale dhe me standardet dhe vlerat e transmetimit publik.”
“Në shumë nivele, VRT bashkëpunon mirë me EBU-në. Megjithatë, pa përgjigje serioze në lidhje me shqetësimet tona në lidhje me Festivalin e Këngës në Eurovision, ne do ta rishqyrtojmë pjesëmarrjen tonë në të ardhmen”, thuhet në deklaratë.
Konkursi i Këngës në Eurovision, i cili thekson neutralitetin e tij politik, u përball përsëri me polemika gjatë finales në Zvicër, ku fitoi këngëtari austriak JJ dhe izraeliti Yuval Raphael fitoi më shumë vota nga publiku. /tesheshi.com/
