Në selinë blu vijon ankthi i listave të kandidatëve për deputetë, e cila do të mësohet për publikun vetëm në mesnatë kur të shkojë në KQZ. Beteja më e fortë është ajo mes deputetëve të vjetër dhe të rinjve që vijnë rishtas pranë opozitës.
Besnik Aliaj, që mban detyrën e shefit të Departamentit të Planifikimit dhe Zhvillimit Urban në PD u bënë thirrje ‘të vjetërve’ që të hapin rrugën për të rinjtë.
Thirrja e tij vjen një ditë pasi një prej kastës së vjetër, Genc Ruli, kërkoi vullnetarisht përjashtimin nga lista e kandidatëve duke i dhënë lajmtumirën edhe politikës aktive.
“O zotërinj lëruani rrugën të rinjve të pastër me shkollë dhe me përvoja suksesi. Hapni rrugën njerëzve të rinj të talentuar. Boll o njerëz, s’e kuptoni që populli është mërzit me të njëjtat fytyra!
Duan fytyra të reja! Djem e vajza të reja që rrezatojnë dije e pozitivitet! Të pakompromentuar, jo servilë, jo sahanlëpirës, të pakalcifikuar, pakonsumuar, paakuzuar! Nuk flas për kalamaj. Por me përvojë e pa konsum. Të rinj në mendje e shpirt! Boll o njerëz se e bëtë baltë. Ikni në punë private. Shikoni punët tuaja. Jepni ndonjë ndihmë të sinqertë të korrigjoni sa mundeni mëkatet! Boll! Lëreni Kryetarin të zgjedhë ekipin që do dhe nesër t’i japim meritat e fitores ose përgjegjësitë e humbjes” -shkruan Aliaj. anëtari i kryesisë së PD.
Aliaj thotë se fitorja vjen vetëm përmes qarkullimit të elitave.
“Demokracia nuk është baras me ju! 27 vjet të njëjtat fytyra! Boll! S’e kuptoni që fitorja e PD dheShqipërisë vjen vetëm nga ripërtëritja dhe qarkullimi i elitave jo nga riciklimi i mbetjeve politike!Turp e faqe e zezë!”- shkruan ai. /tesheshi.com/
