Agjencia Ndërkombëtare e Energjisë Atomike (IAEA) kërkoi vigjilencë të premten lidhur me luftimet pranë termocentralit bërthamor të Rusisë Kursk, një rajon ku forcat ukrainase nisën një ofensivë të madhe tre ditë më parë.
“U bëj thirrje të gjitha palëve të ushtrojnë përmbajtje maksimale për të shmangur një aksident bërthamor që mund të ketë pasoja të rënda rrezatimi”, tha drejtori i përgjithshëm i këtij organi të OKB-së, Rafael Grossi, në një deklaratë.
Ai shton se është “personalisht në kontakt me autoritetet kompetente të dy vendeve” dhe se do të “vazhdojë të informojë komunitetin ndërkombëtar” për situatën.
Gjithçka “funksionon normalisht”, me nivelin e zakonshëm të rrezatimit, pohon zëdhënësi i termocentralit, siç raporton agjencia ruse e lajmeve Ria Novosti.
Forcat ukrainase kanë kryer një sulm të befasishëm në rajonin kufitar të Kursk që nga e marta.
Më shumë se një mijë ushtarë ukrainas hynë në atë zonë me mbështetjen e një duzinë tankesh dhe njëzet automjetesh të tjera të blinduara, njoftoi Shtabi Kryesor i Ushtrisë Ruse, i cili më pas dërgoi tanke dhe topa.
Që nga fillimi i luftës në Ukrainë, IAEA ka paralajmëruar rregullisht për rrezikun e një aksidenti bërthamor, veçanërisht në termocentralin Zaporozhye në Ukrainën jugore, termocentrali më i madh në Evropë.
Ai u pushtua nga forcat ruse në mars 2022, ndodhet pranë qytetit Energodar që ndodhet përgjatë lumit Dnieper, një lumë që vepron si një vijë natyrore midis dy palëve ndërluftuese.
Aktualisht në pezullim, ka qenë vazhdimisht shënjestër e sulmeve, për të cilat Rusia dhe Ukraina akuzojnë njëra-tjetrën.
