Duke folur në kuadër të përvjetorit të 26-të të themelimit të PD-së, ish-ministri i Jashtëm, Besnik Mustafaj, një ndër figurat historike të kësaj partie, tha se pakënaqësia e njerëzve – duke aluduar pra për efektet në popull të qeverisjes së Ramës – jo domosdoshmërisht përkthehet në votë.
Ishte ky një paralajmërim për kryetarin Basha nga ana e Mustafajit për t’i përveshur mëngët në ofrimin e ofertave dhe jo përqëndrimit vetëm në akuza
“Tranzicioni në lidershipin e PD-së ka qenë i ndërlikuar, i vështirë, sepse pas Berishës dhe pas asaj humbje lidershipi i ri kishte sfida shumë të mëdha në kushtet e mungesës së përvojës, në kushtet e një rinovimi të përgjithshëm të PD. Unë besoj se ka ende muaj intensive pune për PD që ajo të bëhet vërtet zëri i pakënaqësisë dhe alternativë për zgjidhjen e problemeve. Sepse pakënaqësia në vetvete thjesht si pakënaqësi nuk përkthehet në votë për opozitën nëqoftëse opozita me programin e saj politik, me figurat që i ofron shoqërisë shqiptare nuk i përgjigjet si duhet”, tha Mustafaj gjatë një prononcimi për Ora News. Që gjatë zgjedhjeve në Dibër, ai nisi të riaktivizohej duke u shfaqur krah Bashës, pas një periudhe kritikash ndaj mënyrës së drejtimit të PD-së. /tesheshi.com/
