Shkodran Mustafi, futbollisti shqiptar i Valencias dhe i përfaqsueses gjermane i cili u bë “çështje dite” në mediat spanjolle pasi nuk pranoi të fliste në një konferencë për shtyp pa larguar më parë një shishe birre pranë tij, nuk është i vetmi rast.
Vitet e fundit nuk kanë qenë të pakta gjestet e ngjashme në botën e sportit dhe posaçërisht futbollit, ku sportistë si ai nuk kanë pranuar të bëjmë kompromise në kundërshtim me principet e besimit.
Precedentët kanë ardhur në rastet e pijeve me përmbajtje alkolike, si dhe tek bankat që operojnë me kamatë.
Përveçse ndalohen rreptësisht për tu konsumuar, si alkoli ashtu dhe kamata, drejtuesit fetarë sqarojnë se të ndaluara janë dhe akte të cilat mund ti promovojnë ato, të cilat e implikojnë besimtarin në gjynah, ose thënë sipas ligjërimit të krishterë, “e shpien në mëkat”.
Tesheshi.com veçon disa nga raste mjaft interesante “shkodranësh”:
Blerim Mazreku: refuzues birrash
Basketbollisti nga Suhareka vendosi t`i mbulojë me ngjitëse sponsorët Birra Peja dhe Pilsner. Ky gjest pati jehonë në mediat kosovare, por Sigal Prishtina, skuadra e Mazrekut, e kaloi pa u trazuar shumë këtë çështje pasi ai ishte një ndër lojtarët kryesorë të kampionëve ballkanikë.
Franck Ribery dhe Mehdi Benatia: duar në vend të shisheve
Dy futbollistët e Bayern Mynhen kanë refuzuar të pozojnë me alkool në dorë. Ndryshe nga i gjithë stafi dhe shokët e tyre të ekipit, francezi Ribery dhe marokeni Benatia që njihen si besimtarë praktikantë, ngritën vetëm duart në vend të gotës së mbushur me alkool, gjatë një pozimi në grup. Ky gjest i tyre nuk çoi fort peshë në mediat gjermane, pasi u trajtua si një e drejtë e tyre për t`i qëndruar besnik parimeve të besimit.
Demba Ba dhe Papis Cise: jo kamatës
Dy ish-futbollistët e Newcastle United, Demba Ba dhe Papis Cisse, nuk u përballën me alkolin por me kamatën. Ata refuzuan të luajnë me fanelat e sponsorit të ri Wonga, sepse në këtë mënyrë do ishin të implikuar në reklamimin e një kompanie kreditore që jepte dhe merrte para me kamatë, gjë po aq e ndaluar si dhe sa alkoli.
Abou Diaby: në stol për hir të agjërimit
Ish-futbollisti i Arsenalit pranoi më mirë të ulej në stol, sesa të prishte agjërimin e tij përgjatë muajit të Ramazanit. Por ai tha se stafi dhe skuadra po e mirëkuptonin për këtë zgjedhje: “Arsenali do të preferonte që unë të mos agjëroj, por ata e kuptojnë këtë si një moment të veçantë për mua dhe po përpiqen që më krijojnë kushte sa më të mira që unë të ndihem mirë”, tha Diaby në një intervistë pas ndeshjes.
Përgatiti: Drilon Sylejmani – /tesheshi.com/
