Me anë të një deklarate, Lëvizja BESA ka njoftuar opinionin për një akt formal zyrtar, që e përfshin atë brenda kuadrit të plotë ligjor e kushteues si organizëm politik në Maqedoni. Ajo njofton se sot e ka marrë vendimin e gjykatës, sipas së cilit është regjistruar në regjistrin e organizatave politike në Republikën e Maqedonisë.
Në këtë mënyrë, thuhet në njoftim, Lëvizja BESA edhe zyrtarisht, me organet zyrtare të formuara konform Statutit të Lëvizjes, do ta ushtrojë veprimtarinë e saj në skenën politike në vend, ndërsa përfaqësues juridik në cilësi të kryetarit të Lëvizjes deri në Kongres do të jetë Bilall Kasami.
Besa u shpall më 22 nëntor 2014, ku u promovua Këshilli Nismëtar i kësaj Lëvizjeje.
Ditët e fundit ajo ka promovuar edhe platformën e saj politike për dalje nga kriza, të quajtur Platforma e së ardhmes “RIDEFINIMI”, e cila vazhdon të promovohet nëpër vendbanimet shqiptare në Maqedoni. /tesheshi.com/
