Një zhvillim interesant ka ndodhur së fundi në kupolën e Lëvizjes BESA në Maqedoni. Këshilli Qendror i kësaj partie, ka shkarkuar kreun e saj, Bilall Kasami, duke e konsideruar si përgjegjësin kryesor për rezultatet e dobëta në zgjedhjet lokale.
Por vetë Kasami ka zgjedhur të mos e pranojë këtë verdikt, pasi paralel ka zhvilluar një mbledhje të ngashme në Tetovë me një rreth të ngushtë të tijin, gjithsesi pa e patur shumicën, si të anëtarëve të Këshillit e si të krerëve të degëve, të cilat së bashku me tre deputetë ka qenë pjesëmarrës në vendimmarrjen e Shkupit, pra atje ku është mbledhur Këshilli Qendror dhe ku është selia kryesore e lëvizjes.
Pjesë nga deklarata për shkarkimin e Kasamit:
“Sot në mbledhjen e Këshillit Qendror ishin shumica e Këshillit, më saktë 64 anëtarë nga gjithsej 108 anëtarët e Këshillit Qendror. Këtu ishin edhe tre deputetë të Lëvizjes BESA, si dhe nënkryetarët dhe Sekretari i Përgjithshëm të Lëvizjes BESA. Përveç kësaj, këtu ishin shumica absolute e kryetarëve të degëve të Lëvizjes BESA, që nënkupton përfaqësimin e plotë edhe të strukturave të Besës.
Me këtë rast, pos tjerash, në këtë mbledhje të Këshillit Qendror, u diskutua për përgjegjësinë e kryetarit të Lëvizjes për rezultatin zgjedhor në zgjedhjet lokale, përgjegjësia për bllokimin dymujor të organeve të Lëvizjes nga Kryetari, por edhe shkelja e Statutit të Lëvizjes nga ai. Për këto arsye sot Këshilli Qendror i Lëvizjes BESA në mënyrë unanime e vendosi shkarkimin e Bilall Kasamit nga detyra e Kryetarit të Lëvizjes BESA. Natyrisht, për këtë do të njoftohen zyrtarisht edhe organet e drejtësisë dhe institucionet e tjera. Sot po ashtu u vendos të miratohet edhe Rregullorja për Organizimin e Kongresit të Lëvizjes BESA, ndërsa udhëheqës i Komisionit për Organizimin e Kongresit u caktua deputeti Nexhbedin Kahremani, njëherazi edhe anëtari më i vjetër i këshillit Qendror.
Pos kësaj, Këshilli Qendror vendosi që Nexhbedin Kahremani të jetë edhe përfaqësues i Lëvizjes BESA para palëve të tjera ose Ushtrues i Detyrës të Kryetarit të BESËS. Meqë prej të hënës fillon procesi i zgjedhjeve të brendshme në Lëvizjen BESA, në këtë mbledhje u konstatua se secili anëtar i Lëvizjes BESA ka të drejtë të kandidojë për secilin post në Lëvizje dhe konform Statutit të Lëvizjes të zgjedhë dhe të zgjidhet.
Kur jemi këtu duam edhe një herë të deklarojmë se përkundër ndërhyrjes brutale të forcave të nëntokës, të shërbimeve të ndryshme dhe forcave të errëta, Lëvizja BESA do të vazhdojë të ecë fuqimisht në përfaqësimin e shqiptarëve të Maqedonisë, për artikulimin e interesave kombëtare të shqiptarëve dhe të qytetarëve të tjera, gjithnjë duke e ruajtur identitetin e saj autonom, autentik dhe autokton, si dhe duke afirmuar platformën RIDEFINIMI, që është zgjidhja e vetme për ndërtimin e një shteti funksional dhe të barabartë për të gjithë qytetarët. BESA e vazhdon rrugën dhe misionin e saj”, përfundon deklarata. /tesheshi.com/
