Silvio Berlusconi u ka kushtuar rreshta të tërë tifozëve të Milanit në një postim elektronik, ku shpjegon dhe shitjen e Milanit një konsorciumi kinez.
Ndërsa e nis kushtimin me fjalët, “Për të gjithë tifozët e Milanit,” ish-kryeministri italian shkruan më tej, “Tridhjetë vite të shkuara e bleva Milanin si një akt dashurie. Po e shes për një akt edhe më të madh dashurie: po ia besoj ekipin një grupi që ka burimet e nevojshme dhe vullnetin për ta kthyer Milani te konkurrimi me klubet e mëdha ndërkombëtare.”
“Natyrisht,” vijon Berlusconi, “jam i prekur dhe i pikëlluar, por gjithashtu jam i qetë në besimin tim se edhe një herë kam vepruar për të mirën e Milanit, e do të vazhdoj të jem tifozi më i zjarrtë.”
“Këto tridhjetë vite do të qëndrojnë në zemrën time, me kujtime të mëdha, të cilat nuk mund të barazohen. Isha i privilegjuar të drejtoja ekipin që unë e doja derisa ai u bë klubi më i suksesshëm në botë.”
Presidenti i Milanit në vitet më të lavdishme të klubit nuk harron t’i falënderojë të gjithë ata që kanë kontribuar për sukseset, “Kujtimet dhe falënderimet shkojnë për lojtarët e mëdhenj, për trajnerët dhe drejtuesit që ia kanë dalë këtu…”
“Mbi të tëra, nuk do të harroj kurrë pjesëmarrjen dhe dashurinë e tifozëve: pasioni i miliona njerëzve për ngjyrat kuqezi ndihmoi që ky ekip të bëhej i veçantë, ndryshe çdo ekipi tjetër, më i fortë se çdo tjetër, më i fortë se padrejtësia, më i fortë se fati i keq.”
Ai shkruan në fund se Milani do t’u kthehet sukseseve, “Jam i sigurt se shpejt do të jemi duke festuar së bashku sukseset e Milanit të ri të madh, duke nderuar traditën tonë të madhe.”
Berlusconi e mbyll kushtimin e tij për tifozët e Milanit me një përqafim të madh për ta, “Një përqafim i madh për çdonjërin nga ju!” /tesheshi.com/
