Për ish-kryeministrin Sali Berisha, marrëdhëniet Shqipëri-Greqi aktualisht janë të ngrira dhe qeveria nuk duhej të kishte hyrë në negociata për marrëveshje të re të detit direkt me Athinën. Nga studioja e emisionit “Debati në Channel One”, Berisha tha se kryeministri grek, Aleksis Tsipras ka anuluar vizitën e paralajmëruar në Shqipëri.
“Është vendim politik për të anuluar vizitën dhe ai dërgoi këtu ministrin e tij të Jashtëm me një mesazh që ia përcolli ministrit shqiptar të Jashtëm dhe nuk tha asnjë fjalë as mediave shqiptare dhe as atyre greke”, tha Berisha.
Sipas tij, arsyet e hollësishme janë për t’u marrë vesh në të ardhmen, por një gjë e them me bindje se është në interesin e shqiptarëve që të bëhen përpjekje serioze për marrëdhënie miqësore me Greqinë dhe çdo vend fqinj. Ishte një veprim shumë i gabuar i qeverisë shqiptare dhe i asaj greke angazhimi në diskutimin e marrëveshjes së detit”, u shpreh Berisha.
“Të dy palët e kanë shumë të gabuar. Ta çonin në gjykatë. Shqipëria mund të merrte pak më shumë a pak më pak por nuk kishte sherr dhe Greqia nuk mund ta pengonte kurrsesi Shqipërinë në procesin e integrimit. Tani mund ta pengojë. Tani vendet europiane mund ta pengojnë Shqipërinë sepse ato kanë një parim: Përsa kohë ke diskutime territoriale nuk ju pranojmë”, tha Berisha. /tesheshi.com/
