Ish-kryeministri Sali Berisha ka rimarrë në dorë skemën e vjetër pas përplasjes së fortë të selisë blu me Shtetet e Bashkuara të Amerikës, si pasojë e dështimit të takimit Edi Rama-Lulzim Basha.
Njeriu me influencën ende të padiskutueshme në PD, si një “lojtar i vjetër” ka rimarrë një manovër të përdorur disa herë, por më e dukshme dhe e fortë u përdor në vitin 1997 kur amerikanët e braktisën totalisht si president të atëhershëm.
Në vitin 1997, Berisha në rolin e kreut të shtetit sulmoi nëpërmjet njerëzve të tij të besuar politikën amerikane dhe dërgoi sinjale përafrimi dhe simpatie me gjermanët.
Një deputete e CDU-së, Fisher, kishte marrëdhënie të mira me PD-në atëkohë. Megjithatë, Berlini ia bëri të qartë ish-presidentit që marrëdhëniet amerikano-gjermane janë perfekte saqë zgjodhën si negociator për krizën shqiptare austriakun që kishte studiuar në SHBA, Franc Vranicki.
Ndërkaq, këtë herë në pozicionin e ish-kryeministrit, Sali Berisha, ka nxitur qarqet pranë tij të sulmojnë ashpër amerikanët dhe veçanërisht ambasadorin Donald Lu, ndërsa vetë është nisur së bashku me Lulzim Bashën në Berlin, ku po zhvillojnë takime në Bundestagun gjerman.
Kreu i Bundestagut, Norbert Lammert, i cili ka ardhur dy herë brenda vitit në Shqipëri dhe ka marrëdhënie të afërta me PD-në, meqë janë edhe së bashku në PPE, ka thirrur në Berlin Berishën e Bashën përpara vizitës në Tiranë të shefit të diplomacisë gjermane, Frank Walter Steinmaier.
Ministri i jashtëm gjerman, i cili politikisht është aleat i Edi Ramës, pasi është bashkë me të në grupin e Partisë Socialiste Europiane, do të vijë në Tiranë më 14 qershor për të negocuar krizën e krijuar për reformën në Drejtësi.
Dy partitë e mëdha gjermane që qeverisin në kabinetin e kancelares Merkel po zhvillojnë negociata intensve për të arritur në një kompromis mes PD-së dhe PS-së.
Ndërkohë që ka zhvillime në Berlin, mediat pranë Berishës kanë sulmuar fuqishëm ambasadorin Donald Lu.
Në një shkrim të publikuar në syri.net, theksohet se Donald Lu po bën aleancë reale me Tom Doshin dhe Armando Prengën për të votuar në parlament reformën në Drejtësi.
Ndërkaq në një shkrim tjetër, rikthehej në skenë Mariza Lino, ambasadorja amerikane në Tiranë, gjatë krizës së 1997-ës, duke e barazuar me Donald Lu-në.
Sipas shkrimit, Lino hartoi Kushtetutën e vitit 1998, e cila është ende në fuqi, dhe sot Donald Lu, ka përgatitur draftin e reformës në Drejtësi.
“Tani është koha, ‘Koha nuk pret’, ‘Nuk ka më kohë’. Këto janë shprehjet që diplomatët e huaj kanë përdorur tash 25 vjet në Shqipëri kur kanë dashur të kalojnë një nismë më së shumti për CV-të e tyre”, theksohet në shkrimin e syri.net, e cili është një media pranë opozitës, veçanërisht ish-kryeministrit Berisha, duke sulmuar kështu pra ambasadorin Donald Lu.
Ndërkaq, Berisha, i cili mbrëmë hodhi statusin e një takimi të mundshëm mes Edi Ramës dhe Elvis Rroshit në Itali, nëpërmjet zyrës së shtypit të PD-së shpërndau një foto përpara Bundestagut me Lulzim Bashën, Fatmir Mediun dhe deputetin e PD-së të Beratit, Astrit Veliaj. /tesheshi.com/
