Edhe pse ka vijuar traditën e tij politike të mosshkuarjes kurrë në ndonjë organ drejtësie sa është thirrur, Berisha ka vijuar dhe me traditën tjetër, atë të gënjeshtrës sy për sy.
“Çdo qytetar duhet ta dijë, se unë sa herë jam thirrur në prokurori, jam paraqitur gjatë jetës sime. Nuk kam refuzuar kurrë. Por unë, jo në mbrojtje time, por në mbrojtje të të drejtave më elementare të çdo qytetari, nuk mund të pranoj të shkelë Kushtetutën”, i tha ai medias, pasi sërish refuzoi të paraqitej në SPAK.
Ish-kryeministri duhet të paraqitej në orën 10:00 para hetueses Adelajda Metaj për komunikim të masës së sigurisë “detyrim paraqitjeje”, por ai pretendon se SPAK po shkel Kushtetutën në rastin e tij.
Berisha po hetohet mbi rolin e tij si kryeministër në privatizimin e ish-kompleksit sportive “Partizani”, aty ku dhëndëri i tij Jamambër Malltezi do investonte në një bllok pallatesh. Prej ditësh ky i fundit është në burg, arrestuar nga SPAK. /tesheshi.com/
