Ish-kryeministri Sali Berisha ka folur ditën e sotme për ndërtimin e murit të serbëve në Mitrovicë, ku edhe një herë nuk i kurseu akuzat për kryeministrin Rama. Berisha ia adresoi fajin Ramës ngritjen e këtij muri.
Sipas ish liderit demokrat, ky mur është rezultati i parë i dashurisë Rama-Vuçiç.
“Pasi dështuan me të gjitha mënyrat për ndarjen e Mitrovicës, Beogradi vendosi të përdorë murin për realizimin e qëllimeve të tij. Ultranacionalistët serbë të Beogradit, në sy të autoriteteve të Kosovës, BE, OKB dhe të mbarë botës po lartësojnë murin ndarës të Mitrovicës së Veriut, de facto të dhunimit flagrant të integritetit territorial dhe sovrantitetit të Republikës së Kosovës”, – shkruan në një postim të tijin Berisha.
Sipas tij, me këtë akt, Beogradi sillet si pushtues i Kosovës, destabilizues i rajonit dhe varrmihës i marrëveshjeve të Brukselit.
“Ky akt akuzon gjithashtu direkt Edvin Kristaq Ramën, i cili në takimet e tij të shumta me Aleksander Vuçiç duket se ka gatuar pazare të pista! Duke dënuar me ashpërsinë më të madhe këtë veprim pushtues të Beogradit ndaj Kosovës, ju bëj thirrje autoriteteve dhe qytetarëve të Kosoves të përdorin të gjitha mjetet kushtetuese për mbrojtjen e integritetit territorial dhe sovranitetit të dhunuar nga pushtuesit e djeshëm serb të Republikës së Kosovës.
Ju bej thirrje komunitetit ndërkombëtar, SHBA, NATO-s, Bashkimit Europian, OKB të marrin të gjitha masat për ndëshkimin e këtij akti agresiv të Beogradit, që dhunon integritetin dhe sovranitetin e një vendi të pavarur dhe rrezikon në mënyrën më serioze paqen dhe stabilitetin e rajonit tonë”, – përfundon reagimin e tij Berisha./tesheshi.com/
