Ballkanit i afrohet një trazire reale dhe jo një këmbimi fjalësh apo deklaratash.
Dhe natyrisht që ndikimi vjen nga ca zhvillime që e kanë ndryshuar përfundimisht botën, siç është fitorja e Donald Trumpit në SHBA dhe fuqizimi i madh i Vladimir Putinit.
Ka qenë njeriu më i besuar i Moskës në qeveritë e Ballkanit, përkatësisht shefi i diplomacisë serbe, Ivica Daçiç, ai që ka hapur “Kutinë e Pandorës”.
Ngaqë nuk ia ka dalë dot me Kosovën, Serbia ka hapur çështjen me Malin e Zi, normalisht dukshëm me një përputhje me Moskën, e cila nuk e do asesi anëtarësimin e Podgoricës në NATO.
Në një intervistë për agjencinë serbe BETA, Daçiç ka deklaruar hapur se “për Serbinë Mali i Zi është si Guinea Papua” dhe ka nënkuptuar se Beogradi mund të kërkojë edhe autonominë e serbëve që banojnë në Mal të Zi.
Pikërisht kjo deklaratë e shefit të diplomacisë serbe i ka futur të dridhurat politikbërësve dhe opinionbërësve në Ballkan.
Po ç’është Guinea Papua? Është një shtet që shpalli pavarësinë nga Mbretëria e Bashkuar, megjithëse është pjesë e Komonuelthit.
Me një fjalë, siç tha numri dy i qeverisë serbe në intervistën e parë të 2017-s, këtë vit Beogradi do të konsiderojë zyrtarisht Kosovën dhe Malin e Zi si shtete që janë larguar nga Mbretëria Serbe dhe do të kërkojë rikthimin e tyre, siç ndodhi me Krimenë, aq më tepër që kjo e fundit u bashkua me Rusinë sipas precedentit të Kosovës.
Deklarata e Daçiç parashikon që së shpejt paritë serbe në Mal të Zi të dalin me kërkesa të reja për autonominë e këtij vendi me një popullsi të vogël, as 800 mijë banorë. Dhe më pas do të ketë negociata, trazira, ndoshta edhe përleshje.
Po shqiptarët e trevave tona atje, Sanxhaku që është fqinj apo boshnjakët që e kanë paralajmëruar këtë gjë?! Cili do të jetë roli i SHBA se Rusia dihet do ta mbështesë Serbinë?
Këto janë pyetjet kryesore që bëhen pas një provokacioni që nuk janë thënë nga një politikan i vogël, por numri dy i qeverisë serbe dhe njeriu më i besuar i Moskës. /tesheshi.com/
