Një prej lojtarëve më të njohur në basketbollin turk në dhjetëvjeçarin e kaluar, shqiptari Ermal Kuqo, apo ndryshe i njohur dhe si Ermal Kurtoğlu, i ka dhënë fund karrierës. Kuqo e ka lajmëruar katër ditë më parë tërheqjen e tij nga basketbolli i luajtur përmes një fotoje kuptimplote.
Veç shtypit sportiv në Turqi, që i ka kushtuar hapësirë këtij lajmi, një prej faqeve më serioze elektronike të kushtuar basketbollit, e që jep informacion në gjashtë gjuhë, eurohoops.net, shkruan mes të tjerash:
“Ermal Kuqo doli në pension. Qendra me përvojë vendosi t’i japë fund karrierës në basketboll në
moshën 36-vjeçare. Ndërsa e nisi karrierën në Tiranë, Kuqo erdhi më pas te Fenerbahçe, për të veshur më tutje bluzën e KK Splitit dhe Pivovarna Laskos. I kthyer në Turqi me Efes Pilsenin, në pesë sezone përjetoi dy fitime të kampionatit e dy të kupës. I aktivizuar për një sezon në Spanjë me Pamesa Valencian, Ermal Kuqo kthehet në Turqi me Anadollu Efesin, për të luajtur pas kësaj me Gallatasarajin, Banvitin, Darushafaka Doushin (Darüşşafaka Doğuş) dhe me Turk Telekomin. Mes viteve 2004-2010 ai u aktivizua me ekipin kombëtar turk, për të ndryshuar mendje më pas, duke luajtur me Shqipërinë. Ermal Kuqo ka luajtur për 14 sezone në ligën turke, duke u aktivizuar në 403 ndeshje; në katër sezone në Euroligë luajti në 114 takime, me një mesatare për ndeshje prej 7.7 pikësh, 3.1 ribaundesh dhe 0.7 asistesh.”
Nikos Zisis, një prej basketbollistëve të njohur të përfaqësueses greke, e që ka luajtur dhe me Fenerbahçen, ka shkruar për Ermal Kuqon në Twitter, “Urime për karrierën tuaj. Gjithë të mirat në të ardhmen.”
“Qe kënaqësi vërtet të ishte në fushë me ty në të njëjtin moment,” është përgjigjur tërë delikatesë Kuqo, që ka marrë dhe një mori mesazhesh të tjera gjatë këtyre ditëve.
Siç është mesazhi i Hidajet Tyrkollusë (Hidayet Türkoğlu), një basketbollist me zë dhe në NBA, që po ashtu e ka lënë basketbollin kohë më parë. “Bluzën e përfaqësueses turke e djersitëm së bashku. Vëllait tim Kuqo i uroj shumë fat në jetën e re…” /tesheshi.com/
