Ben Blushi vijon të dublojë intelektualisht opozitën e djathtë: tjetër shkrim kritik ndaj qeverisjes së majtë

Deputeti i mazhorancës Ben Bushi ka artikuluar sërish kritika ndaj qeverisjes, pjesë e së cilës është dhe ai, ku aktualisht mban dhe postin e kreut të Komisionit të Jashtëm Parlamentar. Në një shkrim të rradhës me titull “Qeveria u bë burokraci”, ai e nis kritikën e tij duke marrë shkas nga një tregues i fundit i INSTAT-it mbi largimin e nga Shqipëria të një numri jo të vogël shqiptarësh përgjatë vitit 2014, duke konkluduar më pas:

Shqiptarët kanë filluar të kenë edhe një dyshim të ri që ua bën ditën më të gjatë dhe jetën edhe më të vështirë. Çfarë vlere ka të zgjedhësh? Çfarë ndryshimi ka mes një qeverie dhe një tjetre? Ku ndryshon një qeveri më një burokraci?

Nëse do përpiqesha të gjeja një ndryshim mes qeverisë dhe burokracisë do thosha se qeveria të nxit të besosh se politikat do ndryshojnë, se jeta do të jetë më e lehtë, se çmimet do jenë të përballueshme, se shërbimet do jenë më të lira, se do të ketë më shumë drejtësi, më shumë barazi dhe taksa më të drejta.

Ndërsa burokracia s’të jep shpresë. Burokracia e votuar është inerciale. Ajo mund të përmirësohet, por nuk është e detyruar të mbajë premtime. Burokracia nuk bën politika. 

Kohët e fundit, Blushi është angazhuar fort në një lloj publicistike politike me theks kritik ndaj qeverisjes. Por ditë më parë, ndaj tij pati një shkrim të fortë kritik nga opinionisti Sokol Shameti me titull “Kur flet dhe Blushi për të varfërit”, ku Shameti e quante të pavlerë frymën që po promovon Blushi, derisa dhe vetë në gjithë këto vite ka qenë pjesë e një politike që e ka katandisur vendin, pikërisht në atë lloj gjendjeje, për cilën shfaq sensitet politik deputeti socialist. /tesheshi.com/