Ben Blushi i është kthyer gazetarisë. Patjetër që është lajm. Por nuk është lajm ajo penë e hidhur anti-islame e tij, e cila, në karrierën si shkrimtar ka si kulm “Të jetosh në ishull”, këtu e ndoca vjet më parë. Për këtë, një penë tjetër e shquar, Ervin Hatibi, do e telendiste keqaz, siç di ai.
Blushi është ndër ata të shumtë të elitës kulturore dhe politike të pasviteve ’90, të cilët u lindën dhe u rritën nën ateizëm. Kështu që nuk përbën fort çudi anti-islamizimi apo anti-fetarizmi i tyre apo i tij. Në fakt, nuk është ditur kurrë nëse Blushi është apo jo fetar. Trashëgimia e tij është ortodokse, me një theks të fort kulturor, nga e cila ai ka trashëguar dhe dhuntinë letrare, edhe atë publicistike gjithashtu. Në këtë pikë, pikëpërputhja apo rivaliteti me Ramën, përveçse politik ka qenë dhe kulturor, apo thënë ndryshe stilistik, në fushën e letrave.
Së fundi, ai i kushton një shkrim një personazhi të pafamë, Eduardit, nipit të Faik Konicës, një zhanër i lëvruar nga gazetaria origjinale e të ndjerit Fatos Baxhaku.
Nuk kishte të sharë në stil përshkrues. Por nuk kishte të sharë në diçka tjetër më të rëndësishme: te sinqeriteti, te ajo besnikëri gazetareske, e cila lë në plan të dytë preferencat apo bindjet personale, duke i qëndruar besnik të vërtetës me të cilën përballesh.
Eduardi është musliman, nga ata me mjekrën dy pëllëmbë, gjë të cilën ia vlerëson në fillim të shkrimit. Ndërsa në fund, pasi rrëfen historinë e tij të tallazuar jetësore, përqendrohet të statusi fetar i personazhit. E pabesueshme të lexosh që ndër penat më helmatisëse antiislame në jetën publike përcjell gjithë mjalt të vërtetat fetare të personazhit, Islamin e tij. Kjo, deri në pikën që, nëse heq autorësinë e shkrimit, askush nuk do e besonte se ka firmën e Ben Blushit.
Ndarë emri e tij nga puna e tij, ajo e përshkrimit të Eduardit dhe përcjelljes së tij publikut, shkrimi i Blushit – Eduard Duralliu, nipi i Faik Konicës – është dhe një leksion moral në gazetari, mu nga fakti që autori transmeton realitetin besnikërisht, pa ndërfutur kund subjektiven e tij në objektivitet. /tesheshi.com/
