Belgjika dhe Hollanda rihartojnë kufijtë e tyre në një shkëmbim paqësor territoresh midis dy vendeve që nuk ka qenë, në fakt, gjithnjë një proces i qetë, ashtu siç e di shumë mirë Europa pas shekujsh luftëra.
Por Belgjika dhe Hollanda kanë vendosur të sfidojnë traditën e përgjakshme historike dhe të shkëmbejnë toka pa qëlluar as edhe një plumb të vetëm. Sa sjellje e përzemërt kjo, në Europë.
Zyrtarët të lartë dhe anëtarë të familjeve mbretërore nga dy fqinjët, vende të Bashkimit Europian nënshkruan një shkëmbim formal territoresh në kufijtë e tyre. Marrëveshja nuk ndryshon shumë nga sipërfaqja e vendeve – Hollanda do të marrë vetëm 25 hektarë më shumë.
Lajmi u bë i ditur nga DutchNews.nl. Por, shkëmbimi i territoreve do të zgjidhë shumë probleme ligjore dhe të juridiksionit që u kanë shkaktuar dhimbje koke të dyja vendeve prej vitesh tashmë.
Si pjesë e marrëveshjes, Belgjika do t’i japë fqinjëve hollandezë dy parcela të pabanuara toke, Presqu’île de L’llal dhe Presqu’île d’Eijsden, që piketojnë kufirin në lumin Maas. Hollanda do ia kthejë favorin duke i dhënë Belgjikës një territor të vogël toke të quajtur Presqu’île Petit-Gravier. Lumi Maas ndërroi shtrat në vitin 1961, duke e drejtuar rrjedhën e tij, e duke i lënë këto copëza toke në anën e gabuar të kufirit prej vendeve respektive. Ato, si pasojë, u shndërruan në “enklava të izoluara paligjshmërie” ku kriminelët dhe trafikantët e drogës lulëzonin biznesin e tyre.
Sipas transmetuesit hollandez, NOS, policia belge mund të arrinte në këto toka vetëm me anije dhe me lejen e qeverisë hollandeze, duke u dhënë kriminelëve kohë të bollshme për t’u arratisur. Ministri i Jashtëm belg, Didier Reynders dhe homologu i tij hollandez, Bert Koenders nënshkruan marrëveshjen, por tashmë duhet që parlamentet kombëtare të të dyja vendeve të miratojnë traktatin.
Belgjika dhe Hollanda mund të rregullojnë hartat e tyre zyrtare vetëm në janar të vitit 2018. Nënshkrimi i paktit ishte shumë i përzemërt. “Ky traktat unik kufitar është një shembull i bashkëpunimit tonë të shkëlqyer me belgët”, tha Koenders. “Ne treguam sot se Hollanda dhe Belgjika mund t’ia dalin si fqinjë të mirë të rregullojnë kufijtë në mënyrë paqësore”.
Kjo është hera e dytë që dy vendet kufitare shkëmbejnë toka në 175 vjet. Shkëmbimi i mëparshëm i tokave, në kohën e revolucionit të përgjakshëm të Belgjikës për të fituar pavarësinë nga Hollanda në vitin 1830, nuk shkoi edhe aq lehtë. Duket gjë e mirë të shohësh se zënkat e vjetra janë varrosur mes dy fqinjëve.
Përgatiti: Juli Prifti – /tesheshi.com/
