Beleri u prit me këngë e valle në Himarë pas lirimit nga burgu, nga ata që vetëidentifikojnë veten si grekë aty.
Ishte në festë edhe ambasadorja greke Kostandina Kamitsi.
“Të dashur himarjotë, të dashur miq… Ju e dini më mirë se të gjithë çfarë kaloi Beleri për të marrë atë që i takoi nga votëbesimi i Himarës. Shumë anë të kësaj çështje do të jenë ende pyetje që kërkojnë përgjigje për ne. Pse u mbajt në paraburgim, pse s’ju dha mandati dhe pse u dënua?”, tha ajo, duke kaluar më pas ne retorikën e mërzitshme të shtetit të saj.
“I urojmë të jetë në lartësinë e detyrës; të mbrojë të drejtat e Himarës, të Greqisë dhe vetë Shqipërisë. Minoriteti grek do të jenë çështje prioriteti e shtetit grek në BE. Dhe po ashtu edhe ambasada do të jetë pranë jush. I uroj suksese si eurodeputet!”.
Ndërsa kandidati i opozitës për Himarën në zgjedhjet e 4 gushtit, Petro Gjikuria, shfaqi gati ekstazë në fjalët e tij, edhe me nota nacionaliste.
“Himara trime. Hapi krahët të pranosh kryebashkiakun tënd! Eurodeputetin tënd. Kjo është një ditë edhe më e madhe, sesa zgjedhjet dhe zgjedhja e tij si eurodeputet. Menduan se do të mund të burgosin lirinë. Arritën vetëm të arrijmë çdo gjë që na takon, që të vijojmë me betejat tona. Lart kokat dhe zemrat! Ju falënderoj që u përmbajtët për 16 muaj! Ju falënderoj edhe për mbështetjen. Kjo fitore ju takon. Ju jeni himarjotët që mbani gjallë Himarën”.
Dhe është sërish momenti për të kujtuar se te personi i Belerit, pos mungesës të ndonjë kualiteti të lartë njerëzor, rëndon dhe hija e një vrasësi, si një prej njerëzve që ishin pjesë e bandës nacionaliste që shkaktuan masakrën e Peshkëpisë në 94-ën. /tesheshi.com/
