Bashkimi Evropian nuk ndërhyn në mosmarrëveshjet dypalëshe, pasi ai ka besim tek aftësia e aktorëve, sidomos nëse aktorët janë shtetet anëtare të BE-së dhe shtetet që do të jenë pjesë e saj për ta zgjidhur këtë çështje në mënyrë që të ketë përfitim reciprok duke zbatuar parimet dhe rregullat, deklaroi zëdhënësi i Komisionit Evropian, Peter Stano, pas komentit të gazetares Joulia Velissaratou, sipas së cilës qeveria greke e kishte bërë të qartë se do të bllokonte rrugën e Shqipërisë drejt BE-së, pasi kryetari i ri i zgjedhur i bashkisë së Himarës, Fredi Beleri ishte ende në burg, sipas OpenNews.Gr.
“Në këtë rast zbatohet ligji. Ligji duhet të respektohet dhe nëse ka dyshime, shtetet anëtare të BE-së dhe gjithashtu shtete si Shqipëria i zotërojnë instrumentet dhe mjetet për t’i dhënë zgjidhje problemeve ose mosmarrëveshjeve të tilla, në mënyrë që të mos krijojnë mosmarrëveshje të panevojshme në marrëdhëniet dypalëshe dhe të mos i ngrenë çështjet bilaterale në nivel unioni, si për shembull në procesin e anëtarësimit”, theksoi Stano.
Axhenda e mbledhjes së Këshillit të Çështjeve të Përgjithshme të BE-së të martën, që përgatit Samitin e BE-së më 14 dhe 15 dhjetor, përfshin zgjerimin e BE-së dhe progresin e anëtarësimit të vendeve të Ballkanit Perëndimor, sipas agjencisë greke të lajmeve ANA.
Sipas draftkonkluzioneve të Samitit, liderët evropianë do të riafirmojnë angazhimin e tyre të plotë dhe të padiskutueshëm për perspektivën e anëtarësimit të Ballkanit Perëndimor në BE dhe do të bëjnë thirrje për përshpejtimin e procesit të anëtarësimit të tyre. /atsh/
