“Lorik Cana, zemra e Shqipërisë”. Ky është titulli i një reportazhi të grupit mediatik “Bein Sport”, i shtrirë në shumë vende të botës, kushtuar kapitenit kuqezi, Lorik Cana, dhe ëndrrës së të gjithë shqiptarëve për të marrë pjesë në kampionatin EURO 2016, që do të zhvillohet në Francë, transmeton Panorama Sport.
Cana, që në kraharor ka shqiponjën e Lacios, ndërsa në krah shqiponjën simbol të kombit të tij, thekson se përfaqësuesja shqiptare mbështetet nga një popull i tërë në rrugëtimin e gjatë e të vështirë për të prekur finalet e EURO 2016.
“Cana nuk e ka harruar kurrë vendlindjen e tij, ku ka marrë edhe mësimet e para. Ai është një shqiptar i Kosovës. Kujtimet e fëmijërisë, të ruajtura me shumë kujdes nga gjyshi i tij, Ganiu, i ngjallin shumë nostalgji”, thuhej në reportazhin kushtuar mbrojtësit. Më tej, Agim Cana, babai i Lorikut, tregon banesën dhe vendin ku djali i tij kaloi vitet e para të jetës dhe ku shfaqi talentin për futbollin.
Në vitin 2002, Cana zhvilloi ndeshjen e parë me fanellën kuqezi përballë përfaqësueses së vendlindjes së tij, Kosovë, në stadiumin e Prishtinës. Loriku e kishte bërë zgjedhjen e tij para një ftese eventuale nga Franca. “Ai ka arritur shumë në karrierën e tij, duke luajtur me PSG-në dhe Marsejën në Francë, me Sandërlendin në Premier Ligë, me Gallatasarajin në Turqi dhe me Lacion në Serinë A. Ëndrra që i ka mbetur është një: të marrë pjesë me Shqipërinë në finalet e një turneu madhor”, mbyllej reportazhi për Canën./tesheshi.com/
