Ish-komandanti i Shtabit të Përgjithshëm të UÇK-së, Azem Syla është përfshirë në debatin ndërmjet ish udhëheqësve të UÇK-së.
Ai ka kritikuar gjuhën që u përdor nga disa udhëheqës të UÇK-së, javëve të fundit. Përmes një shkrimi Syla thotë se tentativën për të përgojuar Luftën Çlirimtare të Kosovës, është veprim qëllimkeq për interesat e të ardhmes së Kosovës, vijimësi të propagandës keqdashëse të UDB-së.
“E konsideroj vlerë politikën. Por nuk mund ta konsideroj politikë atë që përpiqet të shkatërrojë vlerat kombëtare. E tentativën për të përgojuar Luftën Çlirimtare të Kosovës, e konsideroj veprimin më qëllimkeq për interesat e të ardhmes së Kosovës, vijimësi të propagandës keqdashëse të UDB-së”, – thotë ish-komandanti në shkrimin e tij.
Duke renditur se çfarë konsideron vlera kombëtare, ai shton se ndihet i shqetësuar nga disa përplasje politike të ditës, duke tentuar të hidhet baltë mbi luftën, luftëtarët e historinë e asaj kohe të lavdishme të Luftës Çlirimtare.
“Duke kuptuar se çdo rikthim në kohën e Luftës Çlirimtare duhet të jetë rikthim tek lavdia, deklarohem kundër çdo debati që e përgojon atë periudhë. Është detyrë e të gjithë personaliteteve që merren me politikën e ditës, ta bëjnë politikën me mjetet e kohës. Mungesa e vizionit për të tashmen dhe të ardhmen e ka bërë politikën ta kthej në debat për të kaluarën, e jo duke u thirrur në kohën e luftës, për ta vënë atë nën pikëpyetje”, – shkruan ndër të tjera Syla.
Ai e përfundon shkrimin e tij të gjatë duke thënë se luftëtarët e UÇK-së i këshillon të mbeten luftëtar dhe qytetarë të nderuar të Kosovës e gjithë shqiptarizmit, pavarësisht janë qytetarë të thjeshtë, politikanë a funksionarë shtetëror. /tesheshi.com/
