Bosi i Agon Channel, Francesco Becchetti, ka folur sërish nga Londra, duke thënë se nuk do të kthehet në Shqipëri, dhe se do ta përballojë nga Britania e Madhe betejën gjyqësore kundër tij pas akuzave për pastrim parash.
Duke folur për të përditshmen La Repubblica, Becchetti, deklaron se paratë që ka investuar në Shqipëri i ka marrë nga banka të rëndësishme në Europë por refuzon të thojë emrin.
“Ata vijnë nga një prej bankave më të mëdha në Evropë. Ka një kredi, por rezultat i një zgjidhjeje, një marrëveshje në mes të një kompanie në grupin tim dhe një banke. Unë nuk mund të zbuloj emrin, por ju them se bëhet fjalë jo më shumë se 16 transferta. Prokurori i Tiranës duhet të kontrollojë përpara se të kërkojnë arrestimin tim. “
Në lidhje me televizionin Agon Channel, ai deklaroi se edhe nëse e mbyllin do ta hapin prapë, por nuk dha siguri për pagesat ndaj stafit.
“Dallimi në mes Agon Channel dhe kanaleve të tjera është se frikësojmë qeverinë shqiptare. Informacioni është i lirë, ne denoncojmë korrupsionin dhe mashtrimin. Në fushatën zgjedhore ne jemi akuzuar, natyrisht. Por nuk ndalemi, ne do të shkojmë përpara. Nëse na rrëzojnë një kapanon, ne do të ndërtojmë një tjetër! Rreth 500 punonjës që punojnë në TV tim nuk duhet të heqin dorë”, tha Becchetti.
Pyetjes se a do t’i paguajë yjet që ka punësuar ai tha: “Unë nuk e di … do të shohim.”
/tesheshi.com/
