Në gusht, Bashkimi Evropian regjistroi një deficit rekord të tregtisë së jashtme që arriti në 64.7 miliardë euro.
Enti Evropian i Statistikave (Eurostat) ka publikuar të dhënat më të fundit për tregtinë ndërkombëtare të BE-së dhe Eurozonës.
Në gusht, krahasuar me të njëjtën periudhë të vitit të kaluar, eksportet e BE-së u rritën me 24,2 për qind – në 207,1 miliardë euro, ndërsa importet u rritën me 56,4 për qind – në 271,8 miliardë euro. Kështu, deficiti i tregtisë së jashtme të BE-së arriti në 64.7 miliardë euro.
Në eurozonë eksportet u rritën me 24 për qind – në 231.1 miliardë euro krahasuar me të njëjtën periudhë të vitit 2021, ndërsa importet arritën në 282.1 miliardë euro me një rritje prej 53.6 për qind. Deficiti tregtar i Eurozonës në gusht arriti në 51 miliardë euro.
Sipas këtyre të dhënave, deficiti tregtar në BE dhe eurozonë u rrit në nivelin më të lartë të regjistruar ndonjëherë që kur Eurostat po mbledh të dhëna.
SHBA importon më shumë, Kina eksporton më shumë
Në periudhën e përmendur, vendet që kanë importuar më së shumti nga vendet e BE-së ishin Shtetet e Bashkuara të Amerikës me 41.3 miliardë euro, Britania e Madhe me 26 miliardë euro, Kina me 19 miliardë euro, Zvicra me 14.1 miliardë euro dhe Turqia me 8 miliardë euro.
Vendet që eksportojnë më shumë në vendet e BE-së janë Kina me 57.6 miliardë euro, SHBA me 32.2 miliardë euro, Mbretëria e Bashkuar me 21.1 miliardë euro, Norvegjia me 19.1 miliardë euro, Rusia me 15.2 miliardë euro, Zvicra me 11 miliardë euro dhe Turqia me 7.8 miliardë euro.
Deficiti i tregtisë së jashtme të BE-së dhe Eurozonës është shkaktuar kryesisht nga rritja e papritur e çmimit të energjisë së importuar. /tesheshi.com/
