Duhet të ndalojmë së foluri për procesin e paqes dhe të fillojmë të flasim konkretisht për krijimin e dy shteteve – Izraelit dhe Palestinës, tha të hënën, më 22 janar, përfaqësuesi i lartë i Bashkimit Evropian për politikën e jashtme dhe të sigurisë, Josep Borrell.
“Duhet të ndalojmë së foluri për paqen, procesin e paqes dhe të fillojmë të flasim më konkretisht për procesin e krijimit të dy shteteve”, tha Borrell para fillimit të takimit të ministrave të Jashtëm të vendeve anëtare të BE-së, ku një nga temat kryesore është situata në Lindjen e Mesme.
Në takim janë të ftuar diplomatë kryesorë nga Lindja e Mesme, të cilët do të kenë takime të veçanta me ministrat e jashtëm të vendeve anëtare.
“Le të fillojmë të flasim për krijimin e dy shteteve. Rëndësi ka si t’i emërtojmë gjërat dhe tani e tutje nuk do të flas për procesin e paqes por për krijimin e dy shteteve. Nëse jemi seriozë për këtë çështje duhet të shqyrtojmë se çfarë janë shkaqet që pengojnë zbatimin e një zgjidhjeje të tillë”, tha Borrell.
Vendimi për krijimin e dy shteteve, të mbështetur nga OKB-ja dhe komuniteti ndërkombëtar, refuzohet si nga qeveria izraelite ashtu edhe nga Hamasi.
Borrell paralajmëroi për situatën katastrofike humanitare në Gaza.
“Nuk ka fjalë për të përshkruar atë situatë me qindra mijëra njerëz pa asgjë, pa çati mbi kokë, pa ushqim, ilaçe, nën bomba”, tha Borrell.
Ai theksoi se shumë civilë kishin vdekur…
“Mënyra e përpjekjes për të shkatërruar Hamasin nuk është një zgjidhje, ajo mbjell urrejtje për breza njerëzish. Paqja dhe siguria nuk mund të arrihen vetëm me mjetet ushtarake dhe jo për këtë mënyrë specifike të përdorimit të mjeteve ushtarake”, tha kreu i diplomacisë evropiane. /tesheshi.com/
