Një prej rezultateve të prekshme të samitit të Rigës, të mbajtur në dy ditët e shkuara, është marrëveshja e nënshkruar mes BE-së dhe Ukrainës për një hua prej 2 miliardë dollarësh, apo 1.8 miliardë eurosh, e dhënë me synimin për të ringjallur ekonominë ukrainase, e cila vuan nga problemet strukturore dhe nga trazirat në lindjen industriale.
Marrëveshja kërkon nga Ukraina që të adoptojë një seri reformash, mes të cilave janë masat kundër korrupsionit.
Ekonomia ukrainase u tkurr me gati 18 për qind në çerekun e parë të 2015-s krahasuar me një vit më parë, dhe po i ndjen thellë pasojat e konfliktit me separatistët prorusë.
Bashkimi Europian premtoi po ashtu subvencione në një shifër prej 223 milionë dollarësh (200 milionë euro) për mbështetjen e bizneseve të vogla dhe të mesme në Ukrainë, Gjeorgji dhe Moldavi.
Gjithashtu, Ukrainës dhe Gjeorgjisë iu ofrua mundësia e udhëtimit pa viza në vendet e BE-së vitin e ardhshëm, me kusht që të vënë në zbatim këtë vit disa reforma të kërkuara.
Takimi në Riga të Letonisë mes BE-së dhe gjashtë vendeve ish-sovjetike tregoi se marrëdhëniet e ndërsjellta po ndjekin udhë të ndryshme. Vetëm Ukraina, Gjeorgjia dhe Moldavia po kërkojnë integrim më të thellë, ndërsa Bjellorusia dhe Armenia synojnë vetëm bashkëpunim të kufizuar. Krejt ndryshe tyre, Azerbajxhani nuk ka treguar zell për çuarjen më tej të marrëdhënieve me BE-në, gjë e treguar hapur me dërgimin e ministrit të Punëve të Jashtme në Riga, në vend të presidentit.
Deklarata përfundimtare e samitit njohu aspiratat europiane të këtyre vendeve lindore, por pa bërë specifikime të mëtejshme.
/tesheshi.com/
