Komisioni Evropian konfirmoi të hënën se Bashkimi Evropian është i gatshëm të vendosë sanksione ndaj Serbisë për sulmin në veri të Kosovës nëse vendet anëtare të bllokut gjejnë prova të mjaftueshme.
“Bashkimi Evropian është i gatshëm të vlerësojë masat në lidhje me Serbinë nëse vendet anëtare vendosin të kenë informacion të mjaftueshëm, fakte të mjaftueshme,” tha zëdhënësi i BE-së për punët e jashtme Peter Stano.
Ai theksoi se BE-ja do të veprojë kur shtetet anëtare të marrin një vendim, sepse masat kufizuese kërkojnë unanimitet.
Stano tha se BE po pret për “rezultatet përfundimtare të një hetimi të duhur, të detajuar, i cili do të sqarojë të gjitha rrethanat rreth sulmit terrorist” dhe se blloku pret “bashkëpunim të plotë dhe të pakushtëzuar nga Serbia”.
Stano i cilësoi zbulimet e fundit për “stoqe të mëdha armësh në veri të Kosovës” dhe forcimin e ushtrisë në Serbi si “një zhvillim shumë shqetësues”.
Ministri i Brendshëm i Kosovës, Xhelal Sveçla, tha të dielën se qëllimi i “sulmit terrorist të Serbisë” në Banjskë ishte aneksimi i veriut të Kosovës.
Ai tha se përgatitjet për sulmin janë bërë në Serbi dhe se kjo shihet nga dronët e sekuestruar nga grupi.
Sveçla tha se fotografitë dëshmojnë se ky grup në Serbi u përgatit, u stërvit dhe kryeu ushtrime në afërsi të Jagodinës dhe në bazën stërvitore ushtarake në Kopaonik. /tesheshi.com/
