Kreu i Partisë Demokratike, Lulzim Basha në një deklaratë për mediat i kërkoi kryeministrit Rama shkarkimin e menjëhershëm të Dakos, i cili sipas tij “është bërë njësh me krimin”.
Kryedemokrati i bëri thirrje edhe kryeprokurorit që të nisë hetimet ndaj kreut të Bashkisë së Durrësit pas publikimit të investigimit që tregon se Lulzim Berisha u lirua nga burgu me ndërhyrjen e Bashkisë së Durrësit.
“Dako ka zgjedhur me vetëdije të bëhet njësh me krimin, dhe kundër qytetarëve. Këshilltarët demokratë në Bashkinë e Durrësit, kanë vendosur t’i kërkojnë kryeministrit Rama shkarkimin e menjëhershëm të Dakos në përputhje me ligjin. Po kështu i kërkojmë kryeprokurorit të nisë hetimet Dakon. Shoqëritë ku politikën e dominon krimi, janë shoqëritë ku nuk ofrohet zgjidhje, dhe qytetarët i drejtohen emigracionit”, tha Basha.
Në lidhje me këtë rast, ditën e djeshme reagoi edhe bashkia e Durrësit, e cila bëri me dije se kjo është një procedurë normale dhe brenda zbatimit të ligjit, edhe pse sipas bashkisë, mediat e paraqitën ndryshe.
Bashkia e Durrësit ka thënë ditën e djeshme se Lulzim Berisha ashtu si të dënuar të tjerë, me qëllim që të fitonte liri me kusht kanë plotësuar një formular tip, i cili përfshin punë vullnetare në komunitet. Ky formular, sipas burimeve të Bashkisë së Durrësit ofrohet në të gjitha bashkitë e vendit./tesheshi.com/
