Presidenti polak thotë se do të nënshkruajë ligjin kontravers për Holokaustin pavarësisht protestave zemërake nga ana e Izraelit dhe Shteteve të Bashkuara.
Andrzej Duda e mbrojti legjislacionin, që i bën të paligjshme akuzat ndaj Polonisë për bashkëpunim në krimet e nazistëve kur ishte e pushtuar. Qeveria polake thotë se ligji synon të ndalojë fajësimin e kombit apo shtetit të Polonisë për masakra të tilla.
Por, Izraeli ka ngritur shqetësimin se ligji mund të cënojë të vërtetën për përfshirjen e një pjese të polakëve. Ka po ashtu druajtje se të mbijetuarit e Holokaustit mund të përballen me akuza penale për dhënie dëshmie që inkriminojnë polakët.
Gjatë një fjalimi, këtë të martë, Duda tha se ligji “mbron interesat polake… mbron dinjitetin tonë, të vërtetën historike, kështu që ne të mund të gjykohemi drejt nga bota e mos fajësohemi si shtet apo si komb”.
Në një gjest mirëkuptimi ndaj Izraelit, Duda tha se do ta dërgojë ligjin në Gjykatën Kushtetuese për të kontrolluar përputhshmërinë me ligjin Themelor të Polonisë. Por, kjo do të ndodhë pasi ai ta nënshkruajë duke e fuqizuar. /tesheshi.com/
