Në një kohë kur urdhri ekzekutiv i Donald Trump-it për ndalimin e hyrjes në SHBA të refugjatëve e të qytetarëve nga një sërë vendesh me shumicë muslimane, siç është Siria, është bllokuar nga gjykatat amerikane, si dhe ka gjetur kundërshti ngado në botë, shefi i regjimit sirian nuk mendon kështu.
Në një intervistë për transmetuesit francezë, Bashar Assad-i ka deklaruar se përpjekjet e Donald Trump-it për t’i ndaluar qytetarët sirianë të hynin në Shtetet e Bashkuara nuk ishin kundër popullit sirian.
“Janë kundër terroristëve që do të depërtonin mes emigrantëve për në Perëndim. Dhe kjo ngjau. Ndodhi në Europë, kryesisht në Gjermani.”
Me të njëjtën kartë në dorë, ai ka premtuar se do të rimarrë kontrollin e çdo centimetri territor të Sirisë.
Assad-i nuk ka pranuar që përparësi të jetë Rakkaja. “Rakka është një simbol. E keni ISIS-in afër Damaskut, i keni ata ngado,” ka thënë ai në të njëjtën intervistë për televizionet franceze TF1 dhe LCI, e për radion Europe 1.
“Ngado është përparësi, në varësi të zhvillimeve të betejës. Për ne është njëlloj, Rakkaja, Palmira, Idlibi.”
Ai i ka hedhur poshtë gjithashtu raportimet e Amnesty International për mizotëritë, për varjet e mijëra njerëzve në një burg pranë kryeqytetit sirian.
“Nëse do të kishim kryer mizori të tilla, nuk do të kishim mbështetjen (popullore gjatë) gjashtë viteve (luftë),” do t’u deklaronte Assad-i mediave franceze. /tesheshi.com/
