Një grup i DEA-s ameriane ka mbërritur me urgjencë në Shqipëri nga Athina dhe janë vendosur në Tiranë dhe jugun e Shqipërisë, pas aksidentit misterioz të avkatit të Klemend Balilit, një nga juristët më të famshëm në vend, Aleksis Kujas.
Ngjarja ka ndodhur para tre ditësh ndërsa Kujas po kthehej nga Selaniku për në Athinë, ku mësohet se ka tërhequr një dosje të rëndësishme për çështjen “Balili”.
Avokati Kujas ka marrëdhënie direkte me DEA-n amerikane sa i përket trafikut të një sasie të madhe heroine që është dërguar nga SHBA dhe për të cilën akuzohet Balili.
Duke u kthyer nga Selaniku për në Athinë, automjeti që drejtonte avokati i Klemend Balilit ka dalë jashtë kontrollit në një kthesë pranë Ylikis, rreth 70 km nga Athina, dhe është përplasur me pjesën e pasme të një kamioni.
Kujas ka dalë nga makina thuajse i palënduar dhe ka shkuar vetë në spital për një kontroll paraprak.
Disa orë pas aksidentit, ai ka deklaruar para gazetarëve se për pak sa nuk pa vdekjen me sy, por tani ishte shumë mirë. Nuk ka dhënë asnjë sqarim më tepër; por burimet greke të sigurisë thonë se ka pasur një presion të jashtëzakonshëm nga një drejtues tjetër automjeti dhe bëhet fjalë për një aksident të detyruar që për pak mund t’i kishte marrë jetën avokatit grek të Balilit.
I pyetur për zërat që thoshin se Klemend Balili do të dorëzohej vetë tek organet greke, Kujas ka theksuar edhe njëherë se nuk ka pasur asnjë njoftim nga klienti i tij për këtë veprim dhe se tani për tani nuk ka asgjë të vërtetë për dorëzimin e tij.
Mësohet se po shikohet mundësia që organet e sigurisë në Greqi të marrin nën ruajtje të vazhdueshme avokatin Kujas nga frika e ndonjë tjetër “aksidenti”.
Interceptimet telefonike dhe ata satelitore kanë ofruar të dhëna që për ekspertët e DEA-s janë të nevojshme për hetim të mëtejshëm, ndaj kanë mbërritur në Shqipëri.
Është interesant fakti që hetimi i amerikanëve për Balilin bëhet për një periudhë kohe përpara vitit 2013, kur ky i fundit ka pasur një afilacion tjetër politik, por sërish me qeverinë e kohës.
Misteri i vendodhjes së Kelmend Balilit, të ashtuquajturit “Escobari i Ballkanit” është bërë mitik tashmë dhe ka shumë versione për këtë aspekt.
Por burime shumë pranë organeve të sigurisë shqiptare bëjnë të ditur se ai ka kohë që ndodhet “nën reflektorët e shtetit shqiptar dhe pritet vetëm publikimi i ndalimit në fjalë”.
Nga ana tjetër, opozita ka akuzuar qeverinë dhe në veçanti ministrin e Brendshëm, Saimir Tahiri se po mbron “Escobarin”, ndërkohë që vetë ai ka thënë mbi 20 herë që Balili i ka orët e numëruara.
DEA amerikane ka ndjekur që prej dy vjetësh çështjen Balili dhe shumë nga arrestimet që kanë ndodhur në Europë prej rrjetit të “Ecsobarit” janë kryer si pasojë e ekspertizës së Agjencisë së SHBA kundër Narkotikëve.
Por ardhja e tyre prej ditës së djeshme ka lidhje pikërisht me atentatin ndaj avokatit Aleksis Kujas, i cili tashmë është bërë zëri dhe figura publike e Balilit në komunikimin me Antidrogën greke, Europol-in dhe DEA-n.
Ardhja e amerikanëve ka ardhur natyrisht nga dyshimet se autorët e atentatit janë larguar drejt Shqipërisë, ku pritet të hetojnë për disa ditë.
Ndërkohë, Tirana politike ndodhet në kulmin e nisjes së procesit të vettingut, ky gjysma e shtetit, Presidenti dhe një pjesë e qeverisë janë shprehur zyrtarisht kundër filtrit ndërkombëtar.
Një situatë e paprecedentë që nuk e ka para vendi që prej 25 vitesh…/tesheshi.com/
