Kreu i Partisë Demokratike, Lulzim Basha iu është ankuar sërish të huajve për atë që e konsideron kanabizim të vendin nën Edi Ramën. Gjatë një takimi me bashkëraporterët e Këshillit të Europës, Andrej Hunko dhe z. Joseph O’Reilly, Basha u tha atyre kanabizimi i vendit është pasojë e marrëveshjes së Kryeministrit me segmentet kriminale.
“Kjo çoi edhe në kriminalizimin e parlamentit dhe administratës. Përhapja dramatike e sipërfaqeve të mbjella me kanabis u vërtetua nga vëzhgimet ajrore dhe nga tonelatat e kanabisit të kapura në Itali dhe Greqi, është bërë tashmë temë e mediave prestigjioze ndërkombëtare dhe shqetësim për sigurinë e vendeve të BE-së”, shtoi kreu i opozitës. Sipas tij, segmente të caktuara të policisë kanë lidhje me politikanë të lartë, përfshirë dhe ministrin e Brendshëm, të cilët zotërojnë qindra miliona euro dhe rrjet të sofistikuar. “Kjo përbën kërcënim për sigurinë e vendit por edhe më gjerë, sepse bashkëpunimi i këtyre organizatave me terrorizmin ndërkombëtar kërcënon sigurine e rajonit dhe te vendeve europiane”, tha Basha.
Ndërkohë, karta më e fortë e Edi Ramës kundër akuzave të opozitës, është pikërisht faktori ndërkombëtar ku Basha i ka shpeshtuar denoncimet. Shqipëria pret hapjen e negociatave, dhe kjo sipas Ramës nuk mund të ndodh me një vend të pushtuar nga droga, siç e pretendon opozita, por me një vend që i ka shpallur luftë asaj, siç pretendon shefi i qeverisë. /tesheshi.com/
