Kreu i Partisë Demokratike, Lulzim Basha, ka denoncuar arrestimin e një të riu në Elbasan, por që policia, sipas tij, e ka fshehur si ngjarje. Sipas Bashës me 1 nëntor të këtij viti, në Elbasan është arrestuar Orest Lefter Sota pasi nuk i ka ndaluar postobllokut, por pas kontrollit të mjetit i janë gjetur 800 mijë euro dhe dy leje drejtimi në emër të ish-Ministrit Saimir Tahiri.
Basha i kërkon prokurorisë të hetojë ngjarjen.
“Duke denuar ashpersisht fshehjen e kesaj ngjarje kriminale nga Haki Cako dhe Fatmir Xhafa me urdher te Edi Rames, i kerkoj prokurorise te hetoje e te mos shmange nga pergjegjesia autoret dhe urdheruesit e ketij akti mafioz”, shkruan Basha.
Ka reaguar menjëherë policia e Elbasanit përmes një reagimi për mediat duke thënë se Basha nuk duhet të keqinformojë publikun, pasi rasti është sqaruar në komunikatat e saj.
“Më datë 02.11.2017 nga Seksioni kundër Krimit Ekonomik dhe Financiar në Drejtorinë Vendore të Policisë Elbasan është bërë arrestimi në flagrancë i shtetasit O.S., 25 vjeç banues në Tiranë, administrator i një subjekti privat pasi më datë 01.11.2017 në rrugën nacionale në fshatin Balldren u kap pa leje drejtimi me mjetin “Land Rover” dhe gjatë kontrollit të mjetit iu gjetën dhe bllokuan një sasi e madhe eurosh, të cilat do t’i përdorte për likujdimin e faturave, por të pashoqëruar me dokumentin e origjinës”, thotë policia. /tesheshi.com/
