Kreu demokrat Basha i kërkon qeverisë që të gjithë ta kryejnë testin e koronavirusit.
“Shumë qytetarë kanë shprehur shqetësim mbi mungesën e tamponeve të testit për COVID 19. Është urgjente dhe e rëndësishme blerja e menjëhershme e një sasie të mjaftueshme tamponësh me të cilët kryhen testet që saktësojnë nëse je apo jo bartës i COVID 19. Sa më shpejt të identifikohen të prekurit, aq më shpejt mundësohet izolimi dhe trajtimi i tyre duke minimizuar përhapjen e mëtejshme të virusit. Çdo vonesë në sigurimin e një numri më të madh tamponësh testimi do të na kushtojë shumë”, arsyeton Basha.
Kujtojmë se testin vullnetar, pra atë pa asnjë shenjë, e ka kryer deri më tani presidenti Meta, i cili rezultoi i pastër.
Ndërsa Rama ka thënë se nuk e ka parë të nevojshme të bëjë test, gjersa nuk ka asnjë shenjë prekjeje nga koronavirusi, e i përmbahet kësaj praktike.
Nga ana tjetër, Basha kërkon që dhe trajtimet e rasteve të mos bëhen vetëm në Tiranë.
“Veç kësaj duhen krijuar ambjente të posaçme trajtimi për personat e prekur me COVID 19 edhe në qytete të tjera të vendit ku numri i të prekurve sa vjen e rritet. Të prekurit nga virusi nuk kanë pse të përplasen të gjithë në Tiranë kur mund t’u krijohet mundësia të trajtohen në ambiente të ngritura në qendrat e qarqeve. Neglizhenca në marrjen e masave të menjëhershme për shtimin e pajisjeve dhe rritjen e kapaciteve të ambjenteve spitalore dedikuar trajtimit të personave me COVID 19 mund të ketë pasoja shumë të rënda”, shkruan njeriu në krye të opozitës shqiptare.
Gjithashtu, Basha bën propozime dhe në planin social.
“Në këtë situatë, qeveria duhe të marrë masa urgjente të ndihmojë me ushqime dhe detergjentë familjet e varfra dhe ato në nevojë ekonomike. Çdo ditë që kalon e bën të vështirë dhe të pamundur që një pjesë e konsiderueshme e bashkëqytetarëve të përballojnë mbijetesën. Të gjitha vendet e prekura nga COVID 19 veç masave për parandalimin e përhapjes së virusit, kanë ndërmarrë hapa konkretë për të ndihmuar financiarisht qytetarët e izoluar në shtëpitë e tyre dhe bizneset që preken nga kjo situatë. Është koha që dhe qeveria shqiptare të veprojë për të ndihmuar familjet në nevojë”, thotë i pari i selisë blu. /tesheshi.com/
