Kreu demokrat Basha ishte në Kavajë, në një përpjekje për ta rimobolizuar bastionin e dikurshëm në prag të nisjes së protestave të paralajmëruara. Aty ai foli me një gjuhë të ashpër nga qeverisë, ku fjalët vjedhje, grabitje, krim etj., ishin baza e ligjërimit përballë përkrahësve.
“Tani na thotë që më 1 korrik nuk do të ketë më PPP. Normalisht, se deri më 1 korrik nuk do ketë më lekë. Shqipëria do të jetë vjedhur për 15 vitet e ardhshme. Taksat që i kanë shkuar shtetit do të kenë shkuar në xhepat e një bande oligarke, biznesmenësh grabitqarë, që nuk e meritojnë emrin biznes, se vetëm me biznes nuk merren, por vetëm me vjeshje. Për 15-20 vitet e ardhshme. Dhe kjo do të ndodhë nëqoftëse e lejojmë ne dhe ju”, deklaroi kreu demokrat.
Ai më tej u përqëndrua te kauza studentore, duke pretenduar se mund t’jua zgjidhë kërkesat që kanë nëse do qe ai në qeverisje.
“Unë kam parashtruar fare qartë sesi mund të hidhet hapi i parë të zgjidhur krizën në Universitete. Dyfishimi i buxhetit për arsimin e lartë.
Kjo do të thotë që gjithë studentët që vinë nga familje me të ardhura nën 640 mijë lekë të vjetra në muaj përfitojnë jo përgjysmim por financimin e plotë të tarifave universitare për bachelor dhe master. Do të thotë që me paratë e buxhetit të shtetit, që në fakt janë paratë e prindërve tuaj, dhe me asnjë lek shtesë çdo bir dhe bijë shqiptari të ketë mundësinë të ndjekë studimet universitare në institucionet publike të arsimit të lartë pa paguar asnjë lekë nga tarifa universitare.
Për ata që vijnë nga familje me të ardhura mbi 640 mijë lekë të vjetra, përgjysmim tarifash. Për ata të tjerë që edhe me zerimin e tarifave e kanë të pamundur, ata meritojnë dhe duhet të kenë mbështetje financiare nga shteti. Me planin tonë ne mundësojmë që të paktën 5000 studentë shqiptarë që vinë nga familje që nuk kanë mundësinë të përballojnë as kostot minimale jo vetëm nuk do të paguajnë tarifat universitare por do të kenë mbështetje në vlerën prej 2 200000 lekësh të vjetra në vit për tu paguar të gjthë koston e qirasë, librave, transportin publik.
Pas këtyre ndërhyrjeve mbeten mjaftueshëm para për të investuar në infrastrukturën studentore dhe atë akademike, pra në konvikte, por kështu në salla, auditore, laboratore, teknologjinë e informacionit sepse jemi i vetmi vend në Europë, ndoshta dhe në Afrikë, ku kompjuteri mësohet me shkumës dhe dërrasë të zezë”, deklaroi Basha. /tesheshi.com/
