Kreu demokrat Basha iu rikthye pretendimin se taksa progresive e aplikuar nga qeveria “Rama” e ka dëmtuar keq ekonominë. Sipas tij, ajo ka goditur shtresën e mesme. E për këtë arsye, taksa e sheshtë e PD do ishte zgjidhja.
“Politika jonë fiskale është pjesë e Planit Ekonomik për t’i kthyer frymëmarrjen vendit dhe ekonomisë së njerëzve: më shumë të ardhura në xhepat e tyre dhe më pak taksa. Ne do t’i eliminojmë nivelet e shumta të taksave mbi punën, do t’i heqim pengesat që vetëm frenojnë zhvillimin dhe do të thjeshtojmë të gjithë sistemin.
Ne besojmë se më shumë para në duart e qytetarëve do të nxisin investimin në arsimim dhe kualifikim dhe do t’i japin frymë rritjes ekonomike. Politika jonë fiskale ka në bazë taksën e sheshtë 9% për qytetarët dhe të punësuarit, taksa më e thjeshtë dhe më e ulët në të gjitha vendet e rajonit.
Mirëqenia e shtresës së mesme, e atyre që punojnë dhe prodhojnë, është jetike për rimëkëmbjen e gjithë ekonomisë shqiptare”, shkruan Basha.
Por nga ana tjetër, ish-ministri Beqaj tenton ta sfidojë.
“Sfidanti për kryeministër në zgjedhjet e ardhshme parlamentare, LB, ka deklaruar se taksa progresive e Edi Ramës ka rënduar më shumë mbi shtresën e mesme. LB vetë, është i pasur, i varfër apo shtresë e mesme? Mjafton të na tregojë deklaratën vjetore individuale të të ardhurave në vite dhe e kuptojmë nëse gënjen apo thotë të vërtetën”, shkruan njeriu që në mandatin e parë të Ramës mbuloi shëndetësinë. /tesheshi.com/
