Kreu i opozitës Lulzim Basha nuk tërhiqet nga pretendimi, njëherësh akuza, se qeveria ka fshehur, sipas tij, numrin real të vdekjeve nga COVID, bërë mbrëmë një studio televizive e theksuar dhe sot
“Edi Rama po gënjen dhe po fsheh numrin e viktimave të COVID-19 në Shqipëri. Ne kemi detyrën të shpërndajmë të vërtetën në emër të jetëve të humbura”, ka shkruar Basha në postimin e tij, duke e shoqëruar dhe me një video këtë akuzë të rëndë.
Ndodh kjo ndërsa stafi i Infektivit reagoi ashpër, deri sa paralajmëroi thirrjen e prokurorisë për të hetuar të vërtetën.
Nga ana tjetër, Ministria e Shëndetësisë thotë se kjo akuza e Bashës është tejet e rëndë për mjekët.
“Akuza e lëshuar mbrëmë nga Kryetari i Partisë Demokratike, Z. Lulzim Basha, për fshehje të qëllimshme të numrave të qytetarëve që kanë ndërruar jetë, cënon rëndë dinjitetin e mjekëve tanë dhe nxit agresivitetin ndaj tyre, në një kohë kur ata janë aseti më i paçmueshëm që Shqipëria ka në përballjen me pandeminë. Si mund të imagjinohet që të gjithë mjekët tanë të jenë të përfshirë në një manipulim që edhe ta parafytyrosh duhet një papërgjegjshmëri e jashtëzakonshme, ndërkohë që ata kanë përgjegjësi njerëzore, profesionale dhe ligjore për çdo kartelë mjekësore?!”, thuhet në reagim.
Më tej, vjen ftesa për Bashën për ta ballafaquar në terren pretendimin e tij.
“Ministria e Shëndetësisë dhe Mbrojtjes Sociale e rifton zotin Lulzim Basha dhe këdo tjetër për llogari të tij, që të vijë e të ballafaqojë me autoritetet shëndetësore çdo hamendje, përpara se sa të shpërndajë të tilla tymnaja toksike për shpirtrat e mendjet e qytetarëve”, thuhet në deklaratë. /tesheshi.com/
