Kreu i partisë Demokratike, Lulzim Basha paraqiti përpara sipërmarrësve italianë platformën ekonomike që sipas tij, bazohet në taksën e sheshtë për sigurimet shoqërore, kontributet personale dhe sipërmarrjen.
“Platforma jonë parashikon taksa të thjeshta. Themel është taksa e sheshtë prej 9 për qind për të ardhurat personale, për përfitimin koorporativ dhe 9 për qind për sigurimet shoqërore. TVSH-ja do të ketë një shkallë të vetme 15 për qind Tatimi i biznesit të vogël do të jetë 1.5 për qind e xhiros vjetore”, theksoi kreu i opozitës, në një fjalim të gjatë ku ka prekur të gjitha çështjet ekonomike që shqetësojnë biznesin dhe politikën.
Ai premtoi se biznesi do të çlirohet menjëherë nga një mal me kërkesa që i cilësoi si “të shpikura apo të ringjallura prej burokracisë”.
Basha tha se 80 për qind e këtyre kërkesave për biznesin do të anulohen në tremujorin e parë të qeverisjes së PD-së.
Basha u shpreh se takimi është një mesazh pozitiviteti për të nesërmen e Shqipërisë. “Është një takim i jashtëzakonshëm, sepse ndodh në kushtet kur nga Shqipëria janë larguar jo vetëm investimet por edhe qytetarët. 100 mijë njerëz kanë lënë vendin vitin e kaluar, e 200 mijë të tjerë duan të largohen”, tha ai.
Sipas tij, programi ekonomik i opozitës është në gjendje të nxjerrë ekonominë shqiptare nga kriza dhe apatia. “Ky është programi ekonomik me taksa më të ulëta në 20 vite dhe është gjithçka në krah të sipërmarrjes së ndershme”, përfundoi Basha. /tesheshi.com/
