Ndërkombëtarët duket se do kenë tjetër sfidë me opozitën jashtëparalamentare në Shqipëri, pasi kreu demokrat Basha dha sinjalin e parë për moslirim zyrash nga krerët bashkiakë të partisë së tij, të cilët bojkotuan 30 qershorin, e që duhet të lënë karriget më 11 gusht, ku kanë dhe afatin e fundit ligjor të ushtrimit të mandatit.
Por Basha, duke e lexuar ndryshe 30 qershorin e bojkotuar, si një fitore politike të tij, nga Mallakstra, një prej bastioneve të rezistencës anti-30 Qershor, dha sinjalin e parë për betejën e radhës, sa me mazhorancën aq dhe me ndërkombëtarët. “30 Qershori është një masakër elektorale e provuar në sytë e secilit. Përgjegjës kryesor për këtë krim është Edi Rama”, u shpreh Basha, duke shtuar: “Bashkia Mallakaster ka një kryetar legjitim. Ai është Agron Kapllanaj. Derisa të ketë një proces të rregullt zgjedhor, ku përsëri do të konfirmohet si Kryetar Agron Kapllanaj”.
Kështu, pasi humbi betejën me 30 Qershorin, duke mos mundur të bëjë të pamundur procesin e votimit në atë ditë, lidershipi demokrat po tenton të provojë forcën duke paralajmëruar mosdorëzim zyrash.
Ndërkohë, në deklaratën e parë të amerikanëve pas 30 Qershorit, ku vulosën legjitimitetin e votimit, theksuan se presin nga të zgjedhurit e rinj “vijimin menjëherë të punës”. /tesheshi.com/
