Nuk e kishte artikuluar prej gati 4 ditësh, të ashtquatjurën “Republikë të re”, që kur lidhi një pakt politik me Ramën; dhe këtë të martë Basha i është rikthyer tezës së tij çadriste, duke thënë se votimi i së hënës në parlament, ku me konsensus u ndryshua një pjesë e qeverisë duke futur në të 6 “teknicienë” demokratë, i mbyll rrugën çdo krimi zgjedhor.
“Puna e ndershme dhe kurajoze e ministrave teknikë, drejtimi i paanshëm i KQZ-së, kufizimi i shpenzimeve zgjedhore dhe masat e tjera që po ndërmarrim për zgjedhje të lira dhe të ndershme, do u japin qytetarëve mundësinë dhe garancitë që të zgjedhin lirisht qeverinë që ata duan t’i drejtojë. Koha e maskarenjve po mbaron. Tani është koha për Republikën e Re, republikën e lirisë dhe demokracisë së vërtetë”, tha Basha.
“Kuvendi shpalli ligjërisht krim serioz çdo lloj përpjekjeje apo veprimi që kufizon apo cënon vullnetin e lirë dhe votën e lirë të qytetarëve. Dënime të rënda i presin, tani, matrapazët e zinj të blerjes së votës, kriminelët e rrugës dhe ata në poste shtetërore që kërcënojnë apo detyrojnë me forcë qytetarët të votojnë kundër vullnetit të tyre, komisionerët, numëruesit dhe punonjësit zgjedhorë që manipulojnë votimin dhe numërimin e votave, policët dhe ushtarakët të cilët në vend që të mbrojnë të drejtat e qytetarëve dhunojnë të drejtën e shenjtë të votës, punonjësit e shtetit që paratë dhe pasuritë që u takojnë qytetarëve i vënë në shërbim të partisë”, shtoi kreu demokrat.
Por ndërkohë, nga një pjesë e opinionit, si dhe e medias gjithashtu, Basha po akuzohet se me paktin e arritur mes tij dhe Ramës që çoi në mbylljen e çadrës, futjen në zgjedhje dhe gati-gati në një bashkëqeverisje, ai e tradhëtoi kauzën e Republikës së re. /tesheshi.com/
