Fjalimi i kreut demokrat Basha gjatë mbledhjes së Grupit Parlamentar, i është kushtuar më së shumti reformës në drejtësi. Dhe sipas Bashës, është Rama ai që po i vë shkelmin kësaj reforme:
“Reforma në drejtësi është një nga detyrat më të mëdha për hapjen e negociatave me BE-në dhe vizioni ynë është për një drejtësi pa gjyqtarë e prokurorë të korruptuar dhe të pakapur nga politika”, tha Basha, duke shtuar më pas se “Rama dhe kupola e tij synojnë të kapin drejtësinë me një draft parafabrikat”.
Lideri i opozitës tha më tej se Partia Demokratike do vazhdojë të insistojë deri në fund për konsensus mbi draftin e Komisionit të Venecias, i vetmi që sipas tij siguron një drejtësi të pavarur e larg pazareve.
“Ne e kundërshtojmë kapjen e drejtësisë nga qeveria sot dhe çdo qeveri që do të vijë nesër”, tha më tej Basha.
Dhe gjatë fjalës së tij, Basha përcolli dhe definicionin politik të ditës: “Ata janë oligarkia, ne jemi demokracia”. /tesheshi.com/
