Kreu i opozitës Basha prezantoi planin e PD-së për biznesin, ku veçoi pikën me të nxehtë si premtim, atë të kontrollit fiskal.
“Ne do të vendosim një moratorium 1-vjeçar, gjatë të cilit do të ndalohen gjobat nga organet lokale apo qendrore për bizneset dhe do të reformohet tërësisht sistemi i inspektimit.
Ne do ta ulim dhe do ta kufizojmë me ligj edhe numrin e inspektimeve dhe kontrolleve ndaj bizneseve. Gjatë një viti nuk do të bëhen më shumë se 10% inspektime apo kontrolle te bizneseve”, theksoi Basha.
Ai tha se biznesi do jetë prioritet i tij nëse vjen në pushtet.
“Do të luftojmë për një ekonomi tregu ku nuk sundon monopoli apo oligopoli. Ne do të fokusohemi jo vetëm në biznesin e madh por edhe tek biznesi i vogël dhe i mesëm që është motori i ekonomisë shqiptare.
Ne besojmë tek shtresa e mesme dhe jemi të bindur që ajo është shtylla e zhvillimit ekonomik por edhe e stabilitetit demokratik.
Qeverisja e vogël dhe efektive do të jetë në qendër të vëmendjes sonë.
Çdo vendim i qeverisë do të jetë transparent. Unë do të publikoj në 100 ditët e para të punës normën e taksave për 4 vite, duke ofruar parashikueshmërinë fiskale”, theksoi kreu demokrat.
Basha i mëshoi faktit se ato që premton do të mbahen prej tij.
“Nuk janë premtime boshe. Janë përgatitur deri në detaje dhe janë gati të zbatohen menjëherë pasi të fitojmë zgjedhjet. Një kryeministër që nuk i mban angazhimet e tij para qytetarëve nuk ka të drejtën të kërkojë një mandat tjetër”, theksoi njeriu që udhëhqe opozitën. /tesheshi.com/
