Pas Ramës i cili e bëri fakt të kryer shkuarjen në 18 qershor pa PD-në, ka reaguar Basha duke u përbetuar se kjo nuk do të ndodhë.
“Shqiptarët folën. Nuk ka e nuk do të ketë zgjedhje fasadë. Nuk ka dhe nuk do të ketë kurrë më zgjedhje pa popullin, zgjedhje pa opozitën, zgjedhje moniste. Nuk do të ketë kurrë më një diktaturë moniste që emëron edhe opozitën fasadë”, shkroi kreu demokrat në FB.
Ky i fundit ka këmbëngulur sërish se protesta e së shtunës e PD-së ishte më e madhja, e se për këtë arsye sipas tij Republika e re bëhet e paevitueshme.
“Ne kishim dy zgjedhje përpara. Zgjedhja e parë ishte të ulnim kokën e të pranonim fatin tonë si skllevër të republikës së vjetër të krimit, të drogës e të oligarkëve, të pranonim republikën e vjetër ku i gjithë pushteti politik dhe ekonomik kontrollohet nga pak njerëz që shtypin çdo të drejtë dhe mundësi të shumicës së shqiptarëve. Përgjigjen për këtë, shqiptarët e dhanë dje me bashkimin e tyre më të madh kur njëzëri thanë: Kurrë!
Zgjedhja e dytë është në dorën e republikës së vjetër. Të çmontojmë krimin dhe drogën në pushtet e t’u kthejmë pushtetin qytetarëve përmes qeverisë teknike dhe zgjedhjeve të lira e të ndershme ose të përmbysim republikën e vjetër përmes bashkimit, marshimit dhe qëndresës popullore të qytetarëve të Republikës së Re”, theksoi Basha në mesazhin e tij.
Kështu, një ditë para mbërritjes në Tiranë të diplomatit të rëndësishëm amerikan, Hoyt Yee, palët largohen akoma dhe më shumë në pozicione ekstreme duke e vështirësuar kompromisin. /tesheshi.com/
