Pak pasi kryeministri Rama prezantoi platformën e aplikimit për rindërtim, e ku aty ftoi dhe opozitën të denonconte çdo rast abuzivizimi, kreu demokrat Basha e vizatoi krejt gri situatën e post tërmetit.
“Dy muaj pas tërmetit tragjik të 26 nëntorit, ndërsa përkujtojmë me dhimbje 51 jetët e humbura, të gjithë jemi dëshmitarë sesi shteti i babëzisë dhe korrupsionit ka dështuar në çdo detyrë”, shkroi Basha, duke renditur më pas vuajtjen e njerëzve, zgjedhur t’i ilustrojë me foto përkatëse që shkojnë në frymën e tekstit denoncues.
“Sot nuk ka ende një faturë reale dëmesh të vlerësuara.
Sot nuk ka ende një vlerësim përfundimtar të objekteve të pabanueshme dhe të dëmtuara.
Sot ka ende mijëra familje që kalojnë ditët e ftohta nëpër çadra, pa asnjë ndihmë nga shteti.
Sot qytetarët vazhdojnë të sorollaten nga njëra zyrë në tjetrën për të marrë bonusin e qerasë.
Sot ka mijëra qytetarë të cilët nuk kanë ku të fusin kokën dhe nga dëshpërimi, janë futur në banesat e dëmtuara duke rrezikuar kështu jetën e tyre dhe të fëmijëve.
Sot fëmijë e të moshuar janë në gjendje të rënduar shëndetësore për shkak të kushteve të vështira në të cilat po mbijetojnë që prej dëmtimit të shtëpive.
Ende banorët pyesin se cfarë do të bëhet me shtëpitë e tyre, por nuk marrin përgjigje.
Ende sot nuk ka asnjë masë për të ndihmuar në ringritjen e biznesit në Durrës e në zona të tjera të dëmtuara nga tërmeti.
Shumë biznese po mbyllen e qindra qytetarë po mbeten pa punë.
Rënia ekonomike e Durrësit sjell rënie ekonomike të të gjithë vendit”, shkroi Basha. /tesheshi.com/
